Гьар йисан сентябрдин эхирра Кьурагь районда “Кьурагь дагъларин авазар” лишандик кваз халкьдин манийрин республикадин фестиваль кьиле физва.

28-сентябрдиз РД-дин культурадин министерстводин, республикадин халкьдин яратмишунрин кIвалин, Кьурагь райондин администрациядин къаюмвилик кваз ругуд лагьай сеферда тешкилай и фестивалда Ахцегь, Докъузпара, Мегьарамдхуьруьн, Сулейман-Стальский, Кьурагь, Табасаран районрай, Дербент ва Дагъустандин Огни шегьеррай атанвай милли манияр тамамарзавай 50-далай виниз ксари, фольклордин “Кьурагь”, “Шарвили” ансамблри, милли музалатрин оркестрди иштиракна.

Кьурагь райондин кьилин заместитель Махач Хариева халкьдин музыкадиз, бубайрин ирсиниз вафалувиляй фестивалдин вири иштиракчийриз сагърай лагьана, РД-дин культурадин министерстводи ва республикадин халкьдин яратмишунрин кIвали халкьдин яратмишунар виликди тухунин, ихьтин мярекатар тешкилунин карда куьмекар гузвайдакай лагьана.

Махач Хариева къейд авурвал, ругуд лагьай сеферда кьиле тухузвай и фестиваль райондин культурадин уьмуьрда чIехи вакъиадиз элкъвезва.

— Ам иллаки чи аялар патал важиблу я, гьикI хьи, чи меденият, адетар хуьн ва давамарун абурун хиве гьатда, — алава хъувуна райондин кьилин заместителди.

Маида Агьмедова