Мегьарамдхуьруьн райондин Гилийрин хуьре залан атлетикадай спортдин мастер Адиширинов Магьмуда вичин такьатрихъ ва мукьва-кьилийрин куьмекдалди спортзал эцигна. Спортзалдиз “Сократион” тIварни ганва.
Гила адан тербиячийриз спортдай вилик фидай мумкинвал жеда.
Лугьун лазим я хьи, и спортзал Мегьарамдхуьруьн райондин 2-нумрадин ДЮСШ-дик акатзава. Ина аялри неинки штангаяр хкажда, гьакI къуватдихъ галаз алакъалу маса къугъунарни ийида.
Залан атлетикада вичин махсус адетар ава. Мягькем сагъламвал, тIебиатди ганвай къуват, чIехи ашкъи авай аялдиз спортдин и жуьредал машгъул хьун патал диде-бубайрин патай манийвални авачиз хьун чарасуз я.
Тренировкаяр аялар кьве дестедиз пайна гьафтеда вад юкъуз тухудайвал я. Рушарин дестени кардик кутун фикирдик ква. Тренердин къаст спортсменар райондин, республикадин, уьлкведин акъажунриз гьазурун я.
2010-йисалай Мегьарамдхуьруьн 2-нумрадин ДЮСШ-дин тренервиле кIвалахзавай Адиширинов Магьмуд кьилин образование авай, 1-категориядин пешекар-муаллим я. Ада цIудралди зурба пагьливанар гьазурнава. Магьамедов Руслана Владимир шегьерда, Бабаханов Радмира Старый Оскол шегьерда Вирироссиядин акъажунра иштиракна. Абур кьведни Дагъустандин хкягъай командадик кутунва.
Къазанмишнавай агалкьунрай Магьмуд Адиширинов 2017-йисуз «Лап хъсан жегьил тренер» тIварцIиз лайихлу хьана. Магьмудан мурад неинки къуватлу спортсменар гьазурун, гьакI вичин тербиячийрикай акьуллу, камаллу, халкьдин къуллугъда акъвазнавай ватанпересар хьун я.
Спортзал эцигиз вичиз куьмек гайи вирибуруз, гьакIни 2-нумрадин ДЮСШ-дин директор Къазиагьмедов Жамидиназ ва завуч Эфендиев Тимураз ада сагърай лугьузва.
«Лезги газет»
