Дагъларин уьлкведа гьалар секинсуззавай, мукьвал-мукьвал ягъунар, хъиткьинарунар жезвай 2007-йисуз садвал, ислягь уьмуьр пропаганда авунин макьсаддалди Дагъустанда Россиядин регионрай урус театррин коллективар кIватIнай. Абур республикадиз атун патал Россиядин искусствойрин лайихлу деятель, М.Горькийдин тIварунихъ галай Урус драмтеатрдин кьилин режиссёр Скандарбег Тулпарова гзаф чалишмишвилер авунай, актёрриз ва а театррин кьиле авай ксариз аман-минетна — Кеферпатан Кавказдин регионрин, ЧIулав ва Каспий гьуьлерин къерехра авай, мукьвал ва яргъал къецепатан уьлквейрин урус театррин международный фестивалдал чан атана. Идалай кьулухъ дуьньяда машгьур театрри фестивалдиз итиж ийиз башламишна, абур хушуналди Дагъустандиз къвез хьана. Фестивалдихъ мад са макьсад авай: Советрин уьлкве чкIана, кьилди уьлквеярни регионар хьанвай чкайра амай урус театрар виридан рикIелай алатзавай. Виридаз бегенмиш хьайи театррин международный фестиваль гьар кьве йисалай кьиле тухун икьрар хьанвай. Амма, гьайиф хьи,эхиримжи кьуд йисан вахтунда Дагъларин уьлкведа и мярекатдин сергьятра аваз дуьньяда машгьур актёрар кIватI хъхьанвачир.
Малум хьайивал, 2-9-октябрдиз Дагъларин уьлкведа РД-дин Кьилин къаюмвилик кваз 5-сеферда международный и фестиваль кьиле фида. Тамашаяр гваз республикадиз 16 театр къведа, абурун жергедай яз — Албаниядин, Гуржистандин, Азербайжандин, Москвадин, Санкт-Петербургдин, Владимирдин ва масабур. Жюридик культурадин машгьур деятелар тир Нина Мазур, Николай Жегин, Валерий Подгородинский, Александр Мягченков, Гулизар Султанова ква. Жюри лагьайла, им конкурс туш, чкаяр патал бягьсерни кьиле фидач. Жюридин везифа гьар са тамашадилай кьулухъ актёррихъ ва жавабдар маса къуллугъчийрихъ галаз санал гъалатIрин винел кIвалахун, гьа гьисабдай яз маса коллективрини абурун хъсан тежрибадикай менфят къачун я.
2-октябрдин нянин сятдин вадаз Махачкъалада Урус драмтеатрдин вилик, чи республикадин 12 театрдин коллективрин иштираквал аваз, мугьманар къаршиламишунин чIехи мярекат кьиле фида. Милли пар-талар алаз театррин парад жеда. Дуствилин итижлу серенжемдилай кьулухъ фестивалди вичин кIвалах башламишда. Дуьньяда машгьур театррин коллективри чпин жавагьирар тир тамашаяр гъида. Гьар са касдиз лап ужуз къиметрихъ (300 манат) Махачкъаладин (Урусрин ва Къумукьрин театррин) ва Дербентдин (Лезгийрин театрдин) залра абурухъ галаз таниш жедай мумкинвал ава. М.Горькийдин тIварунихъ галай Урус драмтеатрдин директорди къейдайвал, маса уьлквейриз, шегьерриз физ, анрин театррин кIва-лахдихъ галаз таниш жедай мумкинвал гьанихъ хьайитIани авачирвиляй, “Чна а “шегьерарни” “уьлквеяр” ингье Дагъустанда кIватIзава! Буюр”.
Дагъви Шериф
