Махачкъала шегьердин 1-нумрадин клинический больницадин виликан кьилин духтурдал лутувал авунай шак фенва. Силисдихъ авай делилралди, ада вичиз ва бязи къуллугъчийриз бинесуздаказ премияр гуз хьана. И саягъда гайи пуларин кьадар 238 миллион манатдилай алатнава. Прокуратуради кьиле тухвай ахтармишунин нетижайрал асаслу яз, виликан кьилин духтурдилай уголовный дело къарагъарнава, хабар гузва республикадин прокуратурадин пресс-къуллугъди.
Дагъустандин прокуратуради региондин “Шегьердин 1-нумрадин клинический больница” ГБУ-да законодательство кьилиз акъудзавай гьал ахтармишна. Ахтармишунрин материалриз килигунин нетижайрал асаслу яз, РФ-дин УК-дин 159-статьядин 4-паюнай (“Лутувал авун”) уголовный дело къарагъарнава.
Тайин хьанвайвал, 2016-йисалай 2018-йисан апрелдалди идарадин кьилин духтурди, маса ксарихъ галаз виликамаз гаф-чIал сад авуна, вичиз ва больницадин са бязи къуллугъчийриз премияр ва ашкъиламишдай пулар гуниз талукь бинесуз приказар акъудна. И жуьредин пуларин кьадар 238 миллион манатдилай алатнава. Кьилин духтурдин тапшуругъдалди адан заместителди къуллугъчияр, абурун мажибар къачудай картайриз бинесуздаказ янавай пуларин чIехи пай руководстводив вахкуниз мажбуриз хьана.
Кьилди къачуртIа, кьилин духтурдин заместителди медицинадин гзаф багьа тадаракар маса къачун чарасуз тирдакай багьна кьуна, больницадин кьве къуллугъчидивай 3,7 миллион манатдин пулдин такьатар къачуна, пул чуьнуьхна”, баян хгана ведомстводай.
«Лезги газет»
