19-сентябрдиз Дагъустан Республикадин Гьукуматдин Председателдин везифаяр вахтуналди тамамарзавай Артем Здунов регионда яр-емишдин кластер арадал гъуниз талукь проектар раижзавай инвесторрихъ галаз гуьруьшмиш хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Пуд йисан муддатда бажармишун фикирдиз къачунвай проектар веревирд авунин карда РД-дин Гьукуматдин Председателдин заместителдин везифаяр вахтуналди тамамарзавай Гьажимегьамед Гьуьсейнова, РД-дин хуьруьн майишатдин ва суьрсетдин министрдин везифаяр вахтуналди тамамарзавай Абдулмуслим Абдулмуслимова ва маса ксари иштиракна.
Министррин кабинетдин кьили къейдна: “Дуьзгуьндаказ тешкилнавай теплицайрин майишатдиз, продукция еридиз килигна кьилди-кьилди чара авуниз, къапара туниз, метягьар базарда ише фидайвал авуниз, продукция санлай гзаф кьадарра маса гудай, кьилдин чкайриз пайдай центрайриз (ОРЦ) чна еке итиж ийизва”.
Проектрикай РФ-дин мусурман карчийрин Ассоциациядин президент Айдар Шагьимарданова суьгьбетна.
Дагъустандин тIебиатдин ва гьавадин шартIар фикирда кьуналди, чаз ина гьа ихьтин хел вилик тухуз кIанзава. За гьисабзавайвал, и проектриз республикади итиж ийида. ГьикI лагьайтIа, и жуьредин продукция хъсандиз ише физвайди я”, — лагьана ада.
Яр-емиш (некьияр, мереяр, чIулав цIирицIар, хамзар (малина)) дуьньядин лап хъсан технологийрин бинедаллаз битмишардайвал я.
Инвесторри хабар гайивал, проектар кьилиз акъудунин нетижада кIвалахдин 2000 чка тешкилиз жеда.
Гуьруьшдин эхирдай Артем Здунова А.Абдулмуслимовал проект кьилиз акъудун патал кутугай чка тайинарун тапшурмишна.
Чи мухбир
