18-сентябрдиз РД-дин Гьукуматдин Председателдин везифаяр вахтуналди тамамарзавай Артём Здунова Дагъустандин здравоохраненидин министерстводин коллективдихъ галаз совещание кьиле тухвана.
Алай вахтунда региондин здравоохраненидин къурулуш авай гьалдикай ва ам вилик финикай министерстводин кьил Жамалудин Гьажиибрагьимова лагьана. Совещанидал, уьлкведин Президентдин “майдин” указрилай башламишна, “Земский духтур” тIвар алай федеральный программа республикада кьилиз акъудунал къведалди, ведомстводин гьар са хел галай-галайвал веревирдна. Алай йисуз “Земский духтур” программадин бинедаллаз дагъустанви саки 230 пешекардивай зегьметдив эгечIиз ва и кардай 1 миллион манат къачуз жеда. Къенин юкъуз документар кьабулун давам жезва, сифте нубатда сифтегьан хилен (первичное звено) кьит пешейрин иесияр кьабулдайвал я. Артём Здунова хуьрерин здравоохраненидин кадрийриз талукь хъалхъам (кимивал) агалкьунралди ацIурун патал программадин серенжемрин менфятлувал хкажуниз эвер гана.
Милли макьсадрин ва РФ вилик тухунин стратегиядин везифайрин гьакъиндай президентдин Указ кьилиз акъудуникай рахадайла, кьилин фикир сифтегьан (первичный) медицина вилик тухуниз гуда. Идалайни гъейри, онкологиядин ва рикIинни дамаррин азаррин вилик пад кьуниз ва сагъаруниз, аялрин здравоохраненидиз, виниз тир технологийрин медицинадиз, кадрийрин месэлайризни кьетIен фикир гуда.
Совещанидал регионда куьрпе аялар кьинихъ галаз алакъалу месэлани къарагъарна. Премьер-министрдиз эхиримжи йисара ихьтин дуьшуьшар са кьадар тIимил хьанвайди, амма Россиядин юкьван делилрилай 1,5 сеферда артух тирди хабар гана.
Мадни медицинадин яргъал эцигунриз элкъвенвай объектрикайни рахана. Абурукай садни эцигиз 10 йисалайни виниз хьанвай республикадин аялрин онкодиспансер я. Россиядин Гьукуматдин резервдин фондунин такьатрин гьисабдай яз адан эцигунар акьалтIаруниз 350 миллион манат чара авун къалурнава. Корпусда диагностикадин отделение ва 40 койкадин стационар, гьакIни са сменада 200 кас кьабулдай цIийи поликлиника ачухда.
Медицинадин виридалайни яргъал эцигунриз элкъвенвай объект аялрин республикадин клинический больницадин дараматни я. Ам эцигунив гьеле 1982-йисуз эгечIнай, амма къенин юкъузни куьтягьиз хьанвач. Премьер-министрди и эцигунар вичин гуьзчивилик кутун хиве кьуна. Аялрин здравоохраненидиз гьамиша артух фикир гун лазим тирди къейдна.
Совещанидал онкологиядик начагъ жезвайбурун кьадар артух хьунин месэладикайни кьилди рахана. Артём Здунова ракдик рекьизвайбурун кьадар вучиз артух жезватIа и кардай кьил акъудунин, кьилди къачуртIа, Дагъустандин государстводин медицинадин университетдин вилик агьалийрин арада чIуру дакIунар арадал атунин себебрай кьил акъудунин месэла эцигунин тапшуругъ гана.
Агьалийрин кьезилвилер авай къат дарманралди таъминарунин месэлани къарагъарна. И жигьетдай яз РД-дин здравоохраненидин министрдин везифаяр вахтуналди тамамарзавай Жамалудин Гьажиибрагьимова алай йисуз агьалияр дарманралди таъминарунин такьатар 3 сеферда, 11 процентдилай 49 процентдалди артухарнавайдакай хабар гана. Пулсуздаказ дарманралди таъминарунин карда кьилин месэла агьалийрин кьилдин къатари, пул къачуналди, дарманрикай отказунихъ галаз алакъалу я. И карди федеральный бюджетдай чара ийизвай такьатар тIимиларунал гъизва.
Эхирдайни Артём Здунова мукьвал вахтунда, медицинадин гьар са хиле авай гьалариз къимет гуналди, совещанидал къарагъарнавай ва веревирд ийиз агакь тавунвай месэлаяр гьялдай тайин теклифар агакьарунин тапшуругъ гана.
Гьазурайди — Рагнеда Рамалданова
