И йикъара Россиядин Федерациядин Гьукуматдин Председатель Дмитрий Медведева Дагъустан Республикадин Кьил Владимир Васильев кьабулна. Гуьруьш кьиле физвай вахтунда Д.Медведева Дагъустанда коррупциядихъ галаз женг чIугунин жигьетдай тухузвай кIвалахдин тереф хвена.
РФ-дин премьер-министрди Дагъустандин экономика авай гьалдал наразивална.
Гуьруьшдин вахтунда Д.Медведева малумарна хьи, Дагъустандин экономикада “рехи, рагъул” зонади лап еке чка кьазва. Авайвал лагьайтIа, уьлкведин маса регионрив гекъигайла, хейлин еке чка. Коррупциядихъ галаз женг чIугуни республикадин бюджетдиз алава дуллухарни гъида.
РД-дин Кьили республикада налогар тамамвилелди кIватI тийизвайди хиве кьуна. Ада Дагъустан саки са кьадардин агьалияр авай Ставрополдин крайдихъ галаз гекъигна. Ставрополда гьар йисуз алишверишдин 600 миллион операцияр кьиле тухузва. Дагъустанда лагьайтIа, и рекъемдилай 200 миллиондин артухни. Гьа са вахтунда Дагъустанда налогар 4 сеферда тIимил кIватIзава.
В.Васильева уьлкведин премьер-министр регионда и месэла гьялун патал алахъзавайдахъ ва хъсанвилихъ дегишвилер жезвайдахъ инанмишарна. Ада алава хъувуна хьи, коррупциядихъ галаз женг чIугунин нетижада региондин 200 чиновник къуллугърикай азаднава. И кIвалах мадни давамарзава. В.Васильева ФАС-дин Дагъустанда авай управленидин руководитель, ришвет къачудайла, кьур дуьшуьшдин мисални гъана. Адан чкадал маса региондай атанвай кас тайинар хъувунва.
Чи мухбир
