«Лезги газетдиз» Мегьарамдхуьруьн райондин администрациядин пресс-къуллугъди хабар гузвайвал, кьезил атлетикадай Дагъустандин кlвенкlвечивал патал кьиле фейи акъажунра Амина Къаитмазовади нубатдин сеферда агалкьунар къазанмишна.
Кьезил атлетикадай акъажунар Махачкъалада 15-16-сентябрдиз кьиле фена. Зиринг руш Амина Къаитмазовади и сеферда 60 метрдиз чукурунай сад лагьай чка кьуна, яргъивилихъ хкадарунайни, 600 метрдиз чукурунайни кьвед лагьай чкаяр кьуна.
Къейд ийин, райондин кьил Фарид Агьмедова алакьунар авай спортсменриз куьмекар гузва. Амина Къаитмазовади Буткъазмайрин ДЮСШ-да тренер Садир Къаитмазован регьбервилик кваз вердишвилер къачузва. Ам Вирироссиядин кьезил атлетикадин «Агъзур бажарагъ» проектдин иштиракчи хьана.
Аминади Вирироссиядин, Дагъустандин акъажунра гзаф сеферда агалкьунар къазанмишна. Къуй адахъ мадни кьакьан агалкьунар хьурай!
«Лезги газет»
