Кьурагьрин 1-нумрадин мектебдин 10-классда кlелзавай Зубейдат Рамазановади цlи пуд лагьай сеферда яз 2003-2008-йисара дидедиз хьайи гадайрин ва рушарин арада кьезил атлетикадай Дагъустандин кlвенкlвечивал патал кьиле фейи акъажунра гъалибвал къачуна.

Кьурагь райадминистрациядин пресс-къуллугъди «Лезги газетдиз» хабар гузвайвал, акъажунар 15-16-сентябрдиз Махачкъала шегьерда, Елена Исинбаевадин тlварунихъ галай спортдин майдандал кьиле фена.

Ана РД-дин шегьеррин ва районрин командайри, кьилди къачуртlа, 200-далайни гзаф кьезил атлетикадал машгъул жегьилри иштиракна.

Акъажунрин кьилин макьсад РД-да жегьилрин арада кьезил атлетика машгьур авун ва Сочи шегьерда кьиле фидай Вирироссиядин акъажунрин финалдин паюна иштиракдай лап хъсан спортсменар хкягъун я. Акъажунрин программа гегьеншди тир. Зубейдат Рамазановади къван гадарунин акъажунра иштиракна. Ада гадарай спортдин махсус къван 55 метрдин ва 10 сантиметрдин мензилдиз акъатна.

Дагъустандин кьезил атлетикадин Федерациядин патай ам грамотадалди ва медалдалди къейдна.

«Лезги газет»