Машгьур лезги, медицинадин илимрин доктор, Россиядин лайихлу духтур, тlвар-ван авай хирург-онколог  Вагьид  Абдуллаевич  Эфендиева 1985-йисалай инихъ Калужский областдин онкологиядин диспансердиз регьбервал гузва.

Вагьид Эфендиев 1941-йисан январдиз Ялцугърин хуьре дидедиз хьана. Къанни цlуд йисалайни гзаф я Вагьид Абдуллаевич хизанни галаз гъурбатда яшамиш жез. Ада вичин уьмуьрдин юлдаш Гуьлгез Къурбановнадихъ галаз санал кьве рушаз тербия гана, чlехи авунва.

Духтурвилин пеше хкягъунин къаст адан рикlе гьеле гъве­­чIи чlавалай авай. Икl, Вагьид Эфендиева 1958-йисуз Дербент шегьерда медицинадин училище куьтягьна, фельдшервилин диплом къачуна. Жегьил пешекар Агъул райондин Чирагъ хуьруьз рекье туна, са йисалай адакай анин азар­ха­надин заведующий хьана. Ме­дицинадин илимрин деринриз гьахьунин ният кьилиз акъу­­дун патал ада нубатдин кам ДГМИ-диз къачуна — 1961-йисуз и вуздик экечlна. Кьисмет ахьтинди хьана хьи, кьвед лагьай курсуна кlелзавайла, 220 студентдикай анжах Ва­гьид­ Эфендиеваз армиядин жергейриз эверна. Германияда яракьлу кьушунрин жергейра адакай танкист хьана. Ватандин вилик буржи кьилиз акъудайдалай кьулухъ ам институтдиз хтана ва анаг агалкьунралди куьтягьна. Студент тир йисара ада хирургиядиз иллаки  майилвал ийиз хьана. Гьеле институтда амаз бязи операцияр авунин сирер чирна. Сифтедай ада, пешекар хи­рург­дин куьмекчи яз, тежриба кlватlна.

1970-йисан гатуз адаз Калужский областдиз фин тек­лиф­на. Ам Перемышлда авай райбольницадин духтурвиле кьабулна. Гуьгъуьнлай ада областдин интернатурада чирвилер артухарна. Пуд ­йисуз хирург яз кlвалахай Вагьид духтурдиз Москвадин сад лагьай мединститутдин ас­пирантурадик экечlиз кlан хьана, амма партийный органрин теклиф галачиз экечlиз хьаначир. 1973-йисуз Вагьид Эфендиевакай Перемышлдин ЦРБ-дин кьилин духтур хьана. Ада регьбервал гайи сифте йикъарилай азарханада хъсан шар­тlар тешкилунин мураддалди хейлин кlвалахар кьи­лиз­ акъудна, коллективдин патай еке гьуьрмет къазанмишна.

1974-йисуз ам Москвадин сад лагьай мединститутдин аспирантурадик экечlна. Гуь­гъуьнлай ада медицинадин илимрин докторвилин диссертацияни хвена. ИкI, Вагьид Абдуллаевича гъвечIи чIавалай вичин рикlе авай мурад агалкьунралди кьилиз акъудна.

Куругъли Ферзалиев