И йикъара Докъузпара райондин Усугъчай хуьруьн медениятдин кlвалин дараматда и хуьруьз къуллугъзавай полициядин участковыйдинни жемятдин арада гуьруьш кьиле фена. Нубатдин гуьруьш полициядин къуллугъчиди жемятдиз кlвалахдиз талукь гьахъ-гьисаб гунихъ галаз алакъалуди тир. Икl, Россиядин МВД-дин «Ахтынский» МО-дин полициядин участковый Артур Сафербегова 8 вацран къене тухвай кlвалахдикай агьалийриз галай-галайвал ихтилатна.

Къейд ийин, гуьруьшда Россиядин МВД-дин «Ахтынский» МО-дин начальник Руслан Хаспулатова, хатасузвилин рекьяй Докъузпара райондин кьилин заместитель Къазихан Мегьединова ва масабуру иштиракна.

А. Сафербегован докладдал асаслу яз, хуьруьн сергьятра 2 тахсиркарвилихъ галаз алакъалу делилар дуьздал акъудна, профилактикадин учетда и хуьряй вири санлай 29 кас ава. Административный гуьзчивилик акатай ксар авач.

Полициядин къуллугъчиди ватандашриз уяхвал квадар тавуниз эвер гана, тахсиркарвилерин, къанунсуз крарин гьакъиндай тади гьалда полициядин отделдиз хабар гун тlалабна. Къейд авурвал, мярекатдин кьилин мурад обществодин гегьенш къатари наркоманиядин, терроризмдин четин месэлайриз дикъет гун, абурувай яргъа хьун я.

А. Сафербегова эхирдай алава хъувурвал, алай вахтунда райондин сергьятра «Оружие-выкуп» серенжем кьиле физва. «Оружие-выкуп» серенжемдин сергьятра аваз документар авачир гуьлледин яракьар, МВД-дин тестикьарнавай къиметрал асаслу яз, пулдин пишкешдихъ органрив вахкун тlалабна.

Чи мухбир