Дагъустан Республикада 2016-йисуз кьабулнавай терроризмадин идеологиядиз аксивал авунин Комплексный госпрограмма уьмуьрдиз кечирмишунин сергьятра аваз Белиж поселокдин администрацияди ва ина кардик квай велоспортдин “Леки” клубди велосипедар гьалзавай агьалийрин иштираквал аваз терроризмдиз акси серенжем кьиле тухвана.
Ина велосипедар гьалзавай 100-лай гзаф кIватI хьанвай. Абурун арада яшлубурни, жаванарни, диде-бубайри гъанвай гъвечIи аяларни кваз авай. Акцияда Белиждин гимназиядин, 3 ва 4-нумрайрин, Г.Лезгинцеван тIварунихъ галай школайрин командайрини иштиракна.
Акциядиз кIватI хьанвайбурун вилик рахай Белиж поселокдин кьил Рамиз Гьабибулаева, Дербент райондин физический культурадин ва спортдин рекьяй отделдин начальник Абубакр Ханмегьамедова, “Леки” клубдин регьбер Радик Апаева велоспортдал рикI алайбуруз хуш гафар лагьана, сагълам уьмуьр тухун патал адахъ еке метлеб авайди къейдна.
Шоссейный куьчеда кьиле фейи серенжемдин иштиракчияр поселокдин агьалийри хушдиз кьабулна.
Тешкилатчийри абуруз хъсан савкьатарни гьазурнавай. Мярекатдин иштиракчийриз пулсуз билетар гана, лотерея тухвана. Лотерейдин кьилин приз велосипед тир.
Къагьриман Ибрагьимов
