Дагъустан Республикадин Кьилин къуллугъдал хкянавай Владимир Васильева алай йисан сифте кьиляй регионда гъиле кьур коррупциядиз акси кIвалах давамарда.

РД-дин Халкьдин Собранидин депутатрин вилик рахадайла, В.Васильева лагьана: “Чна квелай башламишнай? Коррупциядихъ ва криминалдихъ галаз женг чIугунилай. Чна кьил кутуналди, Россиядин Генеральный прокуратурадин комиссияди республикадин властдин органра закондал амал тавуниз талукь ахтармишунар кьиле тухвана; Федеральный антимонопольный къуллугъдин аппаратди, Росздравнадзорди, Россиядин зегьметдин министерстводи республикадин  коррупциядин кьарада гьатнавай медико-социальный экспертизадин кIвалах ахтармишзава. Чи кIвалахдин кар алай ерийрик ачухвал, эдеб-ахлакь, гьахъвал ва намуслувал акатзава. Анжах гьа и жуьреда кIвалах давамаруналди чна халкьдин патай властдиз авай ихтибар чкадал  хкида”.

В.Васильева рикIел хкана хьи, ахтармишунрин нетижада кIвалахрилай 60-далай гзаф ксар алудна, хейлинбур жавабдарвилиз чIугуна. Жавабдарвилиз чIугунвай бязи чиновникри ганвай зиянрин кьадар миллиардралди гьисабзава. Мадни ада лагьайвал, ФАС-дин пешекарри  здравоохраненида, санал меслятна, авунвай тахсиркарвилер дуьздал акъуднава. Пуд йисуз тахсиркар тешкилатчийри ва иштиракчийри 7,76 миллиард манат законсуз дуллух  чпин нефсиниз акъудна, рекьер туькIуьрдай хиле и девирда гьа и жуьреда — 17,3 миллиард манат.

«Лезги газет»