И мукьвара Махачкъалада, Расул Гьамзатован тIварунихъ галай Милли библиотекадин конференцийрин залда, шаир Саират Агьмедпашаевадин “Рубаияр” (тираж 1000 экземпляр) тIвар алаз урус чIалал Москвада чапдай акъатнавай сад лагьай ктабдин презентация кьиле фена. Рубаияр урус чIалаз элкъуьрайди дагъустанви шаир, бажарагълу таржумачи Мамед Халилов я.
РикIел хкин: Саират Ферзилаевнадин философиядин тах квай кьуд цIарцIин шииррин сад лагьай ктаб лезги чIалалди 2009-йисуз Махачкъалада чапдай акъатнай.
“Рубаияр” ктаб кIелдайбуруз раиж авуниз талукьарнавай мярекатдиз лезгийрин интеллигенциядин векилар, автордин яратмишунрал рикI алай ксар, ярар-дустар, Крымдайни мугьман атанвай. Абуру шад вакъиа тебрикна, цуьквер багъишна, рубаияр кIелна. Президиумда Дагъустандин писателрин Союздин председатель Мегьамед Агьмедов, ктабдин таржумачи, шаир Мамед Халилов, “Лезги газетдин” жавабдар секретарь Шихмурад Шихмурадов, Крым республикадин писателрин Союздин председатель Валерий Басыровни ацукьнавай.
Мярекат библиотекадин край чирдайбурун ва милли литературадин отделдин кьилин пешекар, РД-дин культурадин лайихлу работник Секинат Мусаевади ачухна, М.Халилова мярекат давамарна. Ада вичин рахунар Саиратан яратмишунриз къимет гунилай башламишна. Авторди рубаийра вичин тIебии гьиссер-тIал, гьейранвал, умудлувал къалурзавайди къейдна. Таржумаяр ийидайла, кIевера тур месэлайрикайни лагьана.
Вичин нубатда Саирата ктаб акъудиз куьмек гайи, адан презентациядиз талукь мярекат тешкилай ксариз, таржумачи Мамед Халиловаз чухсагъул малумарна, вичин са шумуд рубаи кIелна.
Литературовед, публицист, РД-дин культурадин лайихлу работник Фейзудин Нагъиева Саират кьуру чкадал “экъечI” тавунвайди, хизанда пуд шаир-диде Мислимат, стха Агьмедпаша Агьмедпашаев (“Куьредин ярар” тешкилай ксарикай сад) ва Саират авайди къейдна. Кьуд цIарцIе авторди вичин фикирар еке устадвилелди раижзава, абур лезги халкьдин камалдалди девлетлу я.
Мярекатдал Дагъустандин халкьдин шаир Арбен Къардаш, Дагъустандин писателрин Союздин председатель Мегьамед Агьмедов, зари ва алим Гьаким Къурбан, педагог Исламудин Гьуьсейнов, дарги дишегьли-шаир Хадижат Ражабова, Каспийск шегьердин 1-нумрадин юкьван школадин директор Фатима Халилова ва масабурни рахана.
“Лезги газетдин” жавабдар секретарь Ш.Шихмурадова ктаб вичин кIалубрал ва манадал гьалтайла кIелдайбуруз еке савкьат хьанвайди, рубаийра автордивай философиядин тах квай фикирар, вичик къалабулух кутазвай гьиссер раижиз, уьмуьр вичин вилерай аквазвай тегьер къалуриз алакьнавайди къейдна. Алай девир бажарагълу ксар патал четинди хьуниз килигна, Ш.Шихмурадова ахьтин ксариз куьмек гуниз эвер гана, лутуйрихъ галаз женг чIугвазвай алай девирда Саиратан хьтин яратмишунрихъ тербиядин кьетIен метлеб авайвиляй “Рубаияр” ктаб республикадин премия гун патал къалурун теклифна.
Рагнеда Рамалданова
