“Гьуьрметлу “Лезги газетдин” редакция!
Зун 1996-йисалай зегьметдин ветеран я. 54 йисуз муаллимвиле зегьмет чIугуна ва и кар давамарзава. Заз квевай хабар кьаз кIанзавай са кар ава. Начагъвал себеб яз, заз инвалидвилин III группа ганва. Июлдилай лагьайтIа, и группадиз килигна, заз ветеранвиляй къвезвай 504 манат акъвазарнава. ТIалабда им дуьз кар яни, тушни чирун, газетдин чинилай хабар гун.
За фикирзавайвал, зегьметдин ветеранвилин тIвар-чIугур гьакъисагъ зегьметдин нетижа яз ганвай шабагь я. Ам гуз-вахчудай закон ава жал!?
Гьуьрметдивди, Райсудин Набиев”.
РЕДАКЦИЯДИН ПАТАЙ
Гьуьрметлу Райсудин муаллим! Куь суалдиз жаваб гун патал чна Дагъустандин зегьметдин ва яшайишдин рекьяй вилик финин министрдин везифаяр вахтуналди тамамарзавай Расул Шапиевич Ибрагьимован тIварцIихъ чар рекье туна.
Ингье чаз анай хтай жаваб.
“2004-йисан 29-декабрдиз кьабулай Дагъустан Республикадин “Далу патан зегьметчийриз ва зегьметдин ветеранриз яшайишдин рекьяй куьмек гунин гьакъиндай” 59-нумрадин закондин 6-статьядал асаслу яз, зегьметдин ветеранриз 504 манатдин кьадарда аваз гьар вацра чара ийизвай пул (ЕДВ) къачудай ихтияр ава. И пул Дагъустан Республикадин Гьукуматди тайинарзавай къайдада гузва.
Политический репрессийрин къурбандриз, далу патан зегьметчийриз ва зегьметдин ветеранриз гьар вацра чара ийизвай пул гунин Къайдадал- Дагъустан Республикадин Гьукуматдин 2005-йисан 17-октябрдин 173-нумрадин къарардалди тестикьарнавай къайдадал — асаслу яз, гьа са вахтунда федеральный са шумуд закондалди ва Дагъустан Республикадин законралди къалурнавай ЕДВ къачудай ихтияр авай касдиз, а ЕДВ тайинарзавай бинейрилай аслу тушиз (ЕДВ «Чернобылдин АЭС-дал хьайи мусибатдин нетижада радиациядин таъсирдик акатай гражданриз яшайишдин жигьетдай хуьнин гьакъиндай Федеральный закондал, “Семипалатинскдин полигондал ядерный яракь ахтармишунин нетижада радиациядин таъсирдик акатай гражданриз яшайишдин жигьетдай заминвилер гунин гьакъиндай” Федеральный закондал асаслу яз, ЕДВ тайинарай дуьшуьшар квачиз), гражданиндиз вичи хкязавай са ЕДВ гуда.
2018-йисан июлдиз инвалидвилин группа (куьне къалурнавай касдиз инвалидвилин III группа) гайидалай кьулухъ ЕДВ акъвазарнава. Инвалидвилин III группадин ЕДВ-дин кьадар зегьметдин ветерандин ЕДВ-дилай гзаф тирвиляй адан (инвалидвилин группа къачузвай касдин) хийирдиз яз пулунин кьадар артух тир ЕДВ гуда. Ам лагьайтIа, 1995-йисан 24-январдиз кьабулай “Россиядин Федерацияда инвалидар яшайишдин рекьяй хуьнин гьакъиндай” Федеральный законда къалурнавайвал, III группадин инвалиддиз хьиз, квез РФ-дин Пенсийрин фондунин Дагъустан Республикада авай отделениди тайинарзава”.
