“Играми редакция!
Квез чар кхьизвайди Докъузпара райондин Авадан хуьре яшамиш жезвай Гьидаятова Салимат Расимовна я. Чи хизан-зун, буба, стха- Россиядин гражданар яз, Дагъустанда яшамиш жез 15 йисалай виниз я. Чи диде-Афизова Адиба Афизовна-(1965-йисуз дидедиз хьана) вири и йисара чахъ галаз яшамиш жезватIани, ам Азербайжандин учётра ама. Гила диде районда учётда эцигиз кIан хьайила, миграциядин рекьяй къуллугъди ам Азербайжанда 3 вацра ацукьун, яни ана яшамиш хъхьун лазим я, ахпа гражданство гуда лугьузва.
Квевай пара тIалабзава, чаз са куьмек ая. За-акушерка-медсестра, стхади военный рекьяй контрактник яз кIвалахзава. Буба пенсионер я. Бакудиз хъфена, дидедиз ана яшамиш жедай чка авач. ГьикI ийин, вуч ийин, чна дидедиз чи уьлкведин гражданство гьикI къачун!?”
РЕДАКЦИЯДИН ПАТАЙ
Гьуьрметлу Салимат Расимовна. Куьне вучиз куьн икьван кIевера тунва? Бес хизанда авай вири ксари Россиядин гражданство къачурла, куьн Дагъустанда пропискада турла, дидедин къайгъу а вахтунда вучиз чIугунач!?
Куьне редакциядиз рекье тур чарчиз жаваб гун патал чна ам талукь идарадиз ракъурна. Дагъустан Республикадин миграциядиз талукь месэлайрин рекьяй Управленидай хтай жавабди чун мадни тажубарна. Чарче кхьенва хьи, “Афизова Адиба Афизовнадилай (1965-йисуз дидедиз хьанвай) миграциядиз талукь месэлайрин рекьяй Управленидиз официальный тIалабун (запрос) атанач”.
ГьакI хьайила, чна квез Дербент шегьерда авай УФМС-диз фин, гражданство къачун патал лазим къайдада официальный тIалабун (запрос) авун меслят къалурзава.
