Махачкъалада жаванрин арада классический шахматрай кьиле фейи республикадин акъажунрин гъалибчийрив шабагьар вахкунин мярекатда Госдумадин депутат, “Единая Россия” фракциядин член Гьажимет Сафаралиева иштиракна.

Турнирдин иштиракчияр 9-19 йис хьанвай аяларни жегьилар тир, абурун арада шахматрай Вирироссиядин турниррин гъалибчиярни авай.

Къейд ийин, Гь. Сафаралиев Анатолий Карпован школадин къаюмвилин советдин председатель я.

— Чахъ шахматрин ихьтин зурба школа хьунал зун пара шад я. Турнирриз атуникай, аялрихъ галаз суьгьбе­тар авуникай за лезет хкудзава. Умудлу я, и аялри Да­гъустандин гележег тайинарда. И къугъуни аялриз хвешивал багъишзава, гьа са вахтунда абур акьул-камалдин жигьетдай вилик финиз хъсандиз таъсирзава. Шахматар виридалайни акьуллубуру гъалибвал къазанмишзавай спортдин жуьре я, — лагьана депутатди.

Гъалибчийри цIи СКФО-дин кIвенкIвечивал патал акъажунра Дагъустандин патай векилвалда. Абуруз призар, грамотаяр, медалар ва пулдин пишкешар гана.

Чи мухбир