Махачкъалада магьлейрин ва куьчейрин командайрин арада футболдай шегьердин “Тумаждин туп” ачух турнир акьалтIна. Футболдал рикI алай гъвечIи шегьерэгьлияр патал гьар йисуз тешкилзавай и турнир цIи 21-сеферда кьиле фена. Ам ХХ асирдин хъсан вратарь, и турнир арадал гъайи Лев Яшиназ ва футболдай Россияда кьиле фейи дуьньядин чемпионатдиз бахшнавайди тир.
Финалдин къугъунар ва гъалибчийрив шабагьар вахкунин мярекат “РДЮСШ Политехдин” стадиондал кьиле фена.
“Тумаждин тупунин” тешкилатчияр Махачкъала шегьердин администрациядин спортдин, туризмдин ва жегьилрин крарин рекьяй комитет, РД-дин спортдин ва физический культурадин министерство, Даггостехуниверситет, спонсорар “Денеб” ва “Ростелеком” тир.
ЦIи турнирда 525 командади, яни вад агъзурдалай гзаф аялри иштиракна. Абурукай хъсан гадайрин командаяр яшарин ругуд дестеда, рушарин команда яшарин са группада тайинарзавай. Ина неинки Махачкъаладин, гьакI чи республикадин районрин ва маса шегьеррин командайрини иштиракна.
Финалдилай гуьгъуьниз турнирдин гьуьрметлу мугьманар тир Махачкъала шегьердин администрациядин спортдин, туризмдин ва жегьилрин крарин рекьяй комитетдин председатель Марат Ибрагьимова, футболдай СССР-дин спортдин мастер Александр Маркарова, Олимпиададин къугъунрин гимишдин медалдин сагьиб Мегьамед Ибрагьимова, Махачкъала шегьердин культурадин управленидин начальник Фарид Абалаева, Махачкъаладин образованидин, илимдин, культурадин, спортдин ва жегьилрин политикадин рекьяй комитетдин председатель Марис Ильясова, Махачкъаладин футболдин федерациядин президент Жамал Генжиханова чемпионар ва хъсан игрокар къейдна.
Тафаватлу хьайибур Махачкъала шегьердин собранидин депутатар Сиражудин Мутуева, Тимур Алиева, “Ростелекомдин” Дагъустанда авай филиалдин коммерческий директор Шамил Муталиева, анин пресс-къуллугъдин регьбер Лейла Султановади, “Олимп” ДЮСШ-дин директор Вадим Зиятханова, женгинин искусствойрин спортшколадин директор Рамазан Рамазанова, 1-нумрадин спортшколадин директор Мегьамед Суменова, шегьердин спорткомитетдин физический культурадин ва спортдин отделдин начальник Самир Гьабидова, панкратиондай Дагъустандин хкягъай командадин кьилин тренер Абдулкерим Айгунова пишкешралди къейдна.
А.Маркарова лагьана: “И турнир машгьурди хьанва. Чна ам 21-сеферда тешкилнава ва гьар сеферда иштиракчияр тир аялрин кьадар артух жезва. Анжах аялрихъ, абурун диде-бубайрихъ, тешкилатчийрихъ галаз санал чавай гьар йисуз “Тумаждин туп” мярекат кьиле тухуз жезва. Умудлу я, къе ина авай аялрикай премьер-лигадин командайрик кваз къугъвадайбур жеда”.
М.Ильясов: “Спортдал гъвечIи чIавалай машгъул хьун герек я. Сагърай чпин аялриз спорт кIанарзавай диде-бубаяр”.
Чи мухбир
