Сулейман-Стальский райондин Герейханован 1-хуьруьн Р.Османован тIварунихъ галай школадин спортсменар — стхаяр тир Гьабибулаеври са шумуд акъажунра чпин алакьунар къалурна.
Бедилагь Гьабибулаев 2004-йисуз Герейханован 1-хуьре дидедиз хьана. Ам районда азаддиз кьуршахар кьунай кьиле фейи са шумуд акъажунрин призёр я.
2015-йисуз азаддиз кьуршахар кьунай ЦIийи Макьарин хуьре кьиле фейи турнирда ада 1-чка кьуна. Спортсмендиз и агалкьун хуьруьн кьил А.Къазиагьмедова грамота гуналди тебрикнай.
2016-йисуз Герейханован хуьруьн 2-нумрадин ДЮСШ-да “Жегьилар терроризмдиз акси я” лишандик кваз кьиле фейи спортдин мярекатдани жегьил спортсменди азаддиз кьуршахар кьунай вичин тафаватлувал къалурнай, 1-чка кьунай.
2017-йисуз Герейханован хуьре ХХ асирдин Гомер СтIал Сулейманаз бахшна тешкилай райондин акъажунра Бедилагь 1-чкадиз лайихлу хьанай.
2018-йисуз Нижневартовск шегьерда ЧIехи Гъалибвилин суварин мярекатрин сергьятра аваз кьиле фейи ачух турнирда Бедилагьа кубок къачунай. Гележег авай дагъви хциз хайи ерийривай яргъа къазанмишай агалкьун Нижневартовск шегьердин спортдин борьбадин федерациядин президент В.Халитова мубаракна.
ЦIи Пить-Ях шегьерда Россиядин лайихлу тренер Э.Тахироваз талукьарнавай региондин турнирда кьуршахар кьунай лезги хци 3-чка къазанмишна. Адан гъвечIи стха Эльдарани спортдин рекье вичихъ авай алакьунар раижзава.
2005-йисуз дидедиз хьайи Эльдара 2011-йисалай инихъ школада кIелзава. Умуми образованидин школада кIелунилай гъейри, Эльдара Герейханован хуьруьн 2-нумрадин ДЮСШ-да тренер Руслан Альдырован гъилик азаддиз кьуршахар кьунайни вердишвилер къачузва.
Герейханован хуьре, Вини СтIалдал, Эминхуьре райондин дережадинбур яз, Дагъустандин Огни шегьерда, КьепIиррин хуьре республикадин дережадинбур яз кьиле фейи акъажунра Эльдара вич азаддиз кьуршахар кьунай 1-чкайриз лайихлу тирди субутна.
ЧIехи стхади хьиз, адани Тынь-Яхда, Нижневартовскда, Белый-Ярда ва масанра гъалибвилер къазанмишна.
Гьабибулаеврин киседа мадни самбар турниррин гъалибчияр тирди тестикьарзавай шабагьар ава. Гележег авай спортсменри чпик кутунвай умудар кьилиз акъуддайдахъ чун инанмиш я.
Вадим Жамалдинов
