Ягъунар кьуна
Россиядин Яракьлу Къуватри Киевда авай военный заводриз, Одессадин областдин портуниз гегьенш ягъунар кьуна. Идакай 14-июлдиз РФ-дин оборонадин министерстводи хабар гана.
«Гьар жуьредин ракетаяр ва пилот галачиз лув гудай аппаратар туькIуьруна иштиракзавай военный промышленностдин карханаяр яна», – кхьенва малуматда. Кьилди къачуртIа, «Радиоизмеритель» завод, «УКР АРМО ТЕХ» кархана, гьакIни Одессадин областда авай Южный портуна жуьреба-жуьре парар хуьзвай объектар къайдадикай хкудна.
Къейдзавайвал, Россиядин аскерри ягъунар кьадайла, мидядин ПВО-дин ва ПРО-дин къурулушривай вилик пад кьаз жезвач. Яргъал мензилдиз ядай яракьрин куьмекдалди чи кьушунривай гьам Киевда, гьамни Украинадин вири мулкара лазим чкаяр тергиз жезва.
Икьрар чIурна
Къуватдик умуд кутазвай чIехи уьлквейривай Ирандин дипломатия зайифариз жедач. «РИА Новости» чешмеди хабар гузвайвал, ихьтин фикир Россияда Ирандин векил Казем Жалалиди вичин макъалада лагьанва.
«Ирандиз акси яз тухузвай гьерекатри агалкьунар гъизвач. Ирандин халкьди кьабулнавай фикиррал бинеламиш хьанвай дипломатия акьван мягькем я хьи, гужуник умуд кутазвай дуьньядин чIехи уьлквейривайни ам чIуриз жедач», – кхьенва векилди.
Уьлкве еримлу авунин месэлаяр, Жалалиди тестикьарайвал, хсуси мумкинвилер арадал гъуналди гьялунин къарар кьабулнава.
Тегерандини Вашингтонди 18-июндиз 28-февралдиз башламишай къалмакъал акъвазарунин гьакъиндай меморандумдал къулар чIугунай. ГьакI ятIани, 8-июлдиз США мад ягъунар кьунив эгечI хъувуна. Америкадин регьбер Дональд Трампан гафаралди, гуя Иранди Ормуздин проливда коммерциядин гимийриз акси гьерекатар кьилиз акъудайдалай кьулухъ ягъунар кардик кухтуна. Жаваб яз, Ирандин кьушунри Кувейтда, Бахрейнда ва Иорданияда авай США-дин базайрал гьужумна. Ирандин МИД-ди малумарайвал, Вашингтонди ийизвай гьерекатри идалай вилик хьайи меслятарни икьрарар кIевелай чIурна.
Гьелелиг яракьар ракъурдач
Польшади гьелелиг Украинадиз яракьар ракъурдач. «РИА Новости» чешмеди хабар гузвайвал, ихьтин фикир Польшадин премьер-министр Дональд Туска журналистриз малумарна.
Идалай вилик Польшадин сеймдин спикерди уьлкведи хсуси ПВО-дин къурулуш арадал гъун патал маса къачур «Patriot» ракетаяр Украинадив вахкуникай наразивилелди ихтилатнай.
Россияди гьисабзавайвал, Украинадиз яракьар ракъуруни къалмакъал къайдада туниз чIуру патахъай таъсирзава. Ихьтин гьерекатри НАТО ачухдаказ къалмакъалдик къаришмиш хьунин гьакъиндай шагьидвалзава.
Алакъаяр – уьленда
США-дин президент тир вахтунда Байдена Россиядихъ галаз авай алакъаяр ахьтин уьленда туна хьи, Вашингтондивай исятдани анай эхкъечIдай мумкинвал жагъуриз жезвач. Ихьтин фикир РФ-дин Президентдин куьмекчи Николай Патрушева «РИА Новости» чешмедиз гайи интервьюда къейднава.
МУС тергун хиве кьуна
США-дин госсекретарь Марко Рубиоди МУС (международный уголовный суд) терг авун хиве кьунва. Идакай «CNN» чешмеди хабар гузва.
«Чи гьукуматдин ихтиярда авай вири мумкинвилер ишлемишуналди ва чавай къуватар сад ийиз жедай вири амадагрихъ галаз санал меслятар авуналди, чна МУС тергда», – лагьанва ада.
Адан гафаралди, судди США-диз гуьллейринни ракетайрин куьмекдалди ваъ, вичиз «международный ихтиярар» лугьузвай къуватдалди акси кIвалах тухузва.
Сиясатчиди гьакIни тагькимарна хьи, «МУС-дин тапан гьукум» тахтунай вегьиниз аксивалдай ва гьа са вахтунда США-дин патай куьмекдик умуд кутадай уьлквеяр кьетIен гуьзчивилик акатун мумкин я.
Чешмеди къейдзавайвал, Трампан администрация Афгъанистанда США-дин кьушунри авунва лугьузвай тахсиркарвилер МУС-ди ахтармишунин алахъунрилай нарази я.
Гьазурайди Куругъли Ферзалиев я
