Дагъустандин Кьилин везифаяр вахтуналди тамамарзавай Фёдор Щукина Россиядин генеральный прокурордин заместитель Сергей Бажутовахъ галаз санал республикадин прокуратурадин коллектив ва гьукумдин органрин регьберар мукьвара РФ-дин Президент Владимир Путинан къарардалди Дагъустандин прокурорвиле тайинарай Денис Авдеевахъ галаз танишарна. Идакай РД-дин Кьилин пресс-къуллугъди хабар гузва.
Денис Авдееван ери-бине Самарадин областдай я. Самарадин госуниверситет акьалтIарнавай ада 2001-йисалай прокуратурадин хиле кIвалахзава. Виликдай ада Костромадин областдин прокурордин заместителдин везифаяр тамамарна, гуьгъуьнлай Восточно-Сибирский транспортдин прокуратурадин кьиле акъвазна.
Россиядин генпрокурордин заместитель С. Бажутова цIийи прокурордин тешкиллувилин алакьунар ва адахъ агьалийрихъ галаз кIвалахунин рекьяй авай хъсан ерияр къейдна. Ада гьакIни коллективдин вилик кар алай тапшуругъар эцигна. Къейд авурвал, алай вахтунда кьилин фикир гана кIанзавай месэла селлер атуникди зарар хьайибуруз куьмек гунихъ галаз алакъалуди я. «Яшаймиш жедай кIвалерихъ галаз алакъалу месэлаяр куьруь вахтунда гьялун патал вири къуватар эцигна кIанда», – лагьана ада.
Ф. Щукина республикадин кьиле авайбуру прокуратурадиз куьмек гун хиве кьуна.
Чи мухбир
