Чна виликамаз хабар гайивал, са тIимил йикъар идалай вилик Бакуда UFC-ди тешкилнавай нубатдин турнирда машгьур спортсмен Икрам Алискерова (кьасумхуьруьнви) Бразилиядай тир Брунно Феррейрадихъ галаз бягьс, судьяйри вирида сад хьтин къарар кьабулуналди (30-27, 30-27, 30-27), чи ватанэгьлиди инанмишвилелди гъалибвал къазанмишуналди акьалтIарна.
Бягьсина ада вичин артуханвал сифте декьикьадилай къалурна. Кьилиндини, виниз тир дережа адалай вири пуд раунддани хуьз алакьна. Гьам кIвачин кьилел (стойка), гьамни чилел ярхарна (партер), са шумуд къайда (тейкдаун, гъилералди, кIвачералди метIералди ягъунар) ишлемишуналди (бамишардай къайдадизни мукьва хьанвай), Б. Феррейра мад ва мад сеферра гагь кьулухъди хьуниз, гагь гъилеривди кьил кьуниз мажбурна.
Къейд авун лазим я хьи, И. Алискеров юкьван заланвал авайбурун арада (84 кг-дал къведалди) дивизиондин виридалайни хъсан 15 спортсмендин жергеда гьатнава. Санлай къачурла, гила ада ММА-дай 18-гъалибвал къазанмишнава. Аферин, баркалла!
Рагнеда Рамалданова
