Алай йисан 29-30-сентябрдин йикъара Дагъустандин мулкунал агропромышленностдин хилез талукь «ДагАгроКас­пий» форум  кьуд лагьай сеферда кьиле тухуда, хабар гузва РД-дин хуьруьн майишатдин ва недай суьрсетдин министерстводи.

Каспийск шегьерда тешкилдай мяре­катда Россиядин ва къецепатан уьлквейрай тир хуьруьн майишатдин хилен 100-далай гзаф карханайри ва компанийри иштиракда. Мярекат РД-дин  хуьруьн майишатдин ва недай суьрсетдин министерстводи ва «Дагъустандин тепли­цаяр» ассоциацияди санал тешкилдайвал я.

Кьве йикъан вахтунда выставкадин иштиракчийри  Каспийскдин Али Алиеван тIварунихъ галай спорткомплексдин майдандал хуьруьн майишатдин хилен  виридалайни цIийи технологийралди гьазурнавай тадаракар майдандиз акъудда: агродронар, тракторар, тум цадай, дигидай алатар ва къурулушар, теплицайра ишлемишзавай затIар, гьакIни алай аямдин миянардай шейэр, тумар. Багъманчийриз, уьзуьмчийриз, малдарриз, теплицайра майваяр гьасилунин рекьяй пешекарриз  алай аямдин виридалайни хъсан  тадаракрихъ, нетижалу агротехнологийрихъ ва лап  цIийи жуьредин суьрсетрихъ галаз таниш жедай мумкинвал жеда.

Дагъустандин фермервилин майишатар активнидаказ виликди физва ва  и рекье цIийи алакъаяр туькIуьриз гьазур я. И жигьетдай «ДагАгроКаспий» хуьруьн майишатдин хиле  зегьмет чIугвазвайбур патал алакъаяр тайинардай, пешедин рекьяй цIийи амадагар жагъурдай, цIийи жуьредин технологияр хуьруьн майишатдин тежрибада ишлемишдай  ва  абурун куьмекдалди бегьерлувал, ери хкаждай къайдаяр ахтармишдай майдан я.

Чи мухбир