Дагъустандин хуьруьн майишатдин са жерге идарайрин векилри ва малдарри РФ-дин промышленностдин ва алишверишдин министерствода кьиле фейи федеральный совещанида онлайн-къайдада иштиракна. Ам международный алишверишдин майданра лапагрин сар биржадин къайдада маса гун тешкилуниз талукьарнавай, хабар гузва РД-дин хуьруьн майишатдин ва недай суьрсетдин министерстводи.
Кьилди къачуртIа, РФ-дин промышленностдин ва алишверишдин министрдин заместитель Иван Куликован идарадик кваз кьиле фейи видеоконференциядин веревирдера региондин министерстводин са жерге управленийрин кьилери, гьакIни «Агрофирма Согъратл» СХК-дин председатель Абдурагьман Чураева ва «Агрофирма Чох» КХ-дин председатель Мегьамед Абдурагьманова иштиракна.
Лагьана кIанда хьи, лапагрин сар маса гун патал биржадин майдан арадал гъунин теклиф Россиядин ва Дагъустандин хуьруьн майишатрин министерствойри санал авунай. ТулкI авуна сар маса гунин тегьерда ахтармишунин савдаяр гьеле алай йисан апрелдиз кьиле фена ва абура Дагъустандай тир са шумуд карханадини иштиракна.
РФ-дин промышленностдин ва алишверишдин министерстводи къейдзавайвал, уьлкведа гьар йисуз гьасилзавай 40 агъзур тонндилай гзаф сарикай тахминан 14 агъзур тонн Дагъустандал гьалтзава.
Республикадин майишатри гьазурзавай суьрсет алай вахтунда неинки Россиядин Федерациядин маса регионриз, гьакIни къецепатан са жерге уьлквейриз – Белоруссиядиз, Китайдиз ва Къазахстандиз маса гузва. Совещанидин иштиракчийри тестикьарзавайвал, Дагъустанда гьасилзавай сар биржадал тулкI авуна гунин жигьетдай кутугайди я. Гьаниз килигна, алай вахтунда и рекье алишверишдин майданар гегьеншарунин месэладиз килигзава.
Чи мухбир
