27-июндиз UFC-дин нубатдин турнир пуд дагъустанвидин иштираквал аваз Азербайжандин меркез Бакудин гимнастикадин милли аренада кьиле фида. Кьилди къачуртIа, турнирдин сергьятра аваз, чи машгьур ватанэгьли, ери-бине Кьасумхуьрелай тир Икрам Алискеров бразилви Бруно Ферейрадихъ галаз октагонда «гуьруьшмиш жеда». Бягьс Москвадин вахтуналди нянин сятдин 8-даз 20 декьикьа кIвалахайла гатIунда.
Къейд авун лазим я хьи, Азербайжанда UFC-дин гила кьвед лагьай сеферда кьиле тухузвай турнирда дагъустанви Шарабутдин Мегьамедова (Шара Буллет) Бразилиядай тир спортсмен Мишель Перейрадихъ галаз, Германиядин патай экъечIзавай Абусупьян Мегьамедова Польшадай тир Михал Олексейчукахъ галаз чпин алакьунар къалурда.
РикIел хкин, Икрам Алискерован 32 йис я. UFC-да вичин устадвал ада сифте яз 2023-йисуз къалурна. Адалай инихъ чи ватанэгьлиди 5 бягьс кьиле тухвана, абурукай 4 гъалибвал къазанмишуналди акьалтIарна. Са сеферда ам кумукьна. Октябрдиз кьиле фейи эхиримжи бягьсина, судьяйрин виридан къарар сад хьуналди, Кьиблепатан Кореядай тир Чун Ён Пак адаз магълуб хьайиди яз гьисабна. Какахьай единоборствойрай пешекарвилин спортда И. Алискерова 17 гъалибвал къазанмишна. Анжах кьве сеферда ам магълуб хьана.
Бруно Ферейрадин 33 йис я. Адани UFC-да вичин алакьунар 2023-йисалай инихъ къалурзава. Ада вири 6 бягьс кьиле тухванва, абурукай 3 гъалибвал къазанмишуналди, 3 магълуб хьуналди акьалтIарна.
Рагнеда Рамалданова
