Донбассдин мулкара дяведин махсус серенжем давам жезва. Адал эхир эцигдай, ам куьтягьдай серенжемар кьабулна кIандай чкадал Европадин кар алай уьлквейри мад Украина яракьралди, пуларалди таъминарунин гьакъиндай къарарар кьабулзава. Абуруз женгера телеф жезвай Украинадин ва Россиядин инсанрин гьайиф къвезвач.
Чи уьлкведин вири регионрай, гьа жергедай яз Кьурагь райондайни дяведин махсус серенжемда цIудралди кьегьалри иштиракзава. Абуру миллетбазриз рикIелай тефидай ягъунар кьазва, женгера игитвилер къалурзава. Гьайиф хьи, гуьллейрин харцик, дронрин гьужумдик акатзавайбурукай са кьадарбур телефни жезва.
И йикъара Кьурагь райондин администрациядин кьил Замир Азизова, Украинадин чилел дяведин махсус серенжемда женгинин тапшуругъар тамамардайла, телеф хьайи аскеррин диде-бубайрив абурун рухвайриз ганвай государстводин шабагьар вахкана.
Аскервилин буржи кьилиз акъуддайла, чандилайни гъил къачуна, уьтквемвал къалурунай Россиядин Президент Владимир Путинан Указдалди Тагьир Наврузбеговаз жуьрэтлувилин орден, Шалбуз Мегьамедоваз Суворован медаль (телеф хьайидалай гуьгъуьниз) гана. Тагьир Наврузбегов райондин Бугъдатепе хуьряй, Шалбуз Мегьамедов Ашай я.
З. Азизова аскеррин диде-бубайриз, хажалат чIугунивди, башсагълугъвал гана ва лагьана:
— Район патал им залан магьрумвал я. Дяведиз фидалдини абур уьтквем рухваяр тир. Майишатда гьакъисагъвилелди зегьмет чIугуна абуру. Гила чи Ватанда, гьар са хуьре ислягьвал, чи аялрин бахтлу уьмуьр патал абуру чпин чанар къурбандна. Абурун игитвилер чна рикIелай ракъурдач. Ахьтин кьегьалар майдандиз акъудай, абуруз дуьзгуьн тербия гайи куьн сагърай! Райондин администрацияди квез яшайишдин месэлаяр гьялиз куьмек гуда.
Диде-бубайриз теселли гунин, гьайиф чIугунин гафар райондин дишегьлийрин советдин председатель Эльмира Исаевади, администрациядин информациядин технологийрин ва печатдин центрадин регьбер Жаврудин Халикьова лагьана. Мярекатда Бугъдатепе ва Ашар хуьрерин администрацийрин кьилера авай Аскер Жабраилова ва Али Алиева иштиракна.
Хийир Эмиров
