Алай йисан сифте кьилелай инихъ Дагъустандин 230-далай гзаф агьалийрив газдин тадаракар маса къачун патал гузвай пулдин такьатар агакьнава, хабар гузва «Газпром межрегионгаз Махачкала» ООО-ди. Эвездин пулар ва субсидияр, догазификациядин программадин сергьятра аваз, кьезилвилер авай ва СВО-дин иштиракчияр тир агьалийриз гузва. Гузвай пулдин кьадар 100 агъзур манатдиз барабар я. И такьатар газдин пич, къазан, счетчик маса къачуниз, гьакIни кIвалин сергьятрин къенепата газдин турбаяр тухуниз харж ийиз жеда.
«Санлай къачурла, догазификациядин программа кардик кутурдалай кьулухъ республикада куьмекдин и мумкинвиликай тахминан 2200 агьалиди менфят къачуна», — хабар гузва «Газпром газораспределение Дагестан» ООО-дин гендиректор Ризван Мурадова.
РикIел хкин, госпрограммадин сергьятра аваз, тIебии газдин турбаяр агакьарнавай хуьрера яшамиш жезвай агьалийриз чпин чилерин участокрин сергьятрал кьван газ пулсуздаказ агакьардай мумкинвал ава. Программада чилер-кIвалер законлудаказ хсусиятдиз къачунвай иесийривай иштиракиз жезва. КIвалерив тIебии газ агакьар тавунвай агьалийривай и месэла гьялун патал арза агъадихъ галай къайдайрикай сад хкяна агакьариз жеда: яшамиш жезвай чкадин газдин идарайрикай сада; МФЦ-да; газламишунин Сад тир оператордин сайтда (https://connectgasru) ; Госкъуллугърин сайтда; агьалияр яшайишдин рекьяй хуьдай органра. Арзадихъ галаз са жерге документарни агакьарун чарасуз я. Арадал къвезвай суалар «Газпром межрегионгаз Махачкала» ООО-дин «Контакт-центрадиз» ва я пулсузди тир 8-800-200-98-04 нумрадай (кIвалахдин вахтунда) зенг авуналди гуз жеда.
Чи мухбир
