РД-дин Кьилин везифаяр вахтуналди тамамарзавай Фёдор Щукина Дагъустанда кудай-ягъламишдай затIарин жигьетдай арадал атанвай гьалариз талукь баянар гана. Къейд ийин хьи, эхиримжи йикъара республикадин АЗС-ра бензиндин кьадар садлагьана тIимил, идакди кудай-ягъламишдай затIарин къиметарни хкаж хьанва.
Ф. Щукинан гафаралди, ихьтин гьалар арадал атунихъ пуд себеб ава: уьлкведин базарда кудай-ягъламишдай затIарин кьадар садлагьана тIимил хьун, идакди неинки са Дагъустанда, гьакI амай регионрани ихьтин гьалар ава. Кьвед лагьайди, и суьрсетдин къимет хкаж хьун. ТIебии кар я, тайин са затI кьит хьайила, адан къиметни багьа жеда. Амма къиметар кIандайвал хкаждай, агъузардай ихтиярар садахъни авач. И месэла тайин тир гуьзчивал тухузвай органри гьялзава. Пуд лагьайди, Махачкъала, Каспийск шегьерра суддин къарардалди бязи АЗС-рин кIвалах акъвазарун.
«Алай вахтунда гьалар хъсан патахъ дегишарун патал РД-дин Гьукумат республикадиз кудай-ягъламишдай затIар гъидай алава чешмейрихъ къекъвезва. Идалай гъейри, регионда авай гьалдикай РФ-дин Гьукуматдизни хабар ганва. Дагъустандин гьакъиндай тайин тир къарар кьабулдайдак чна умуд кутунва», – къейдна Ф. Щукина.
Чи мухбир
