Дагъустанда гьукумдин кьиле цIийи ксар тайинарайдалай кьулухъ, къанундал асаслу яз, республикадин Гьукуматда, бязи муниципалитетра кадрийрин жигьетдай дегишвилер кьиле физва.
ИкI, РД-дин Кьилин везифаяр вахтуналди тамамарзавай Фёдор Щукинан къарардалди РД-дин Гьукуматдин Председателдин сад лагьай заместителдин везифаяр вахтуналди тамамарзавайди яз Рамазан Жафаров тайинарнава. Рамазан Жафаровичан бинеяр Къурушрин хуьряй я. Ада СССР-дин КГБ-дин Высший школа акьалтIарнава, генерал-майор я. 2013-йисалай Дагъустандин Гьукуматда вице-премьер яз кIвалахна.
Рамазан Жафаров виликдай Манвел Манжонца бегьемарай къуллугъдал тайинарнава. М. Мажонц лагьайтIа, и къуллугъдикай РД-дин Кьилин Указдалди азадна.
Рамазан Жафарован чкадал – РД-дин Гьукуматдин Председателдин заместителдин везифаяр вахтуналди тамамарзавайди яз Валентин Клок тайинарнава. Адан бинеяр Ставрополдай я, хейлин йисара уьлкведин МВД-дин къурулушда кIвалахнава.
РД-дин зравоохраненидин министерстводин кьилни дегиш хьанва. Ярослав Глазован чкадал министрдин везифаяр вахтуналди тамамарзавайди яз Алиомар Агьмедов тайинарнава. Адан бинеяр Новолак райондай я. Виликдай А. Агьмедова Дагъустандин вилерин микрохирургиядин центрадин директор яз кIвалахзавай.
Юстициядин министерствода Мустапа Генжеханован чкадал бинеяр Гуьмбет райондай тир Герей Хаиров тайинарнава. Ада виликдай суддин департаментдин къурулушда кIвалахзавай.
Каспийск шегьердин мэр Борис Гонцовни алай къуллугъдикай азаднава. Шегьердин кьиле вахтуналди бинеяр Ахцегь райондай тир Арсен Шерифов тайинарнава. Ада виликдай Каспийск шегьердин кьилин сад лагьай заместителдин везифаяр тамамарзавай.
Чи мухбир
