Чна виликамаз хабар гайивал, Докъузпара райондин Миграгърин хуьре республикадин дережада аваз путар хкажунай «Миграгъ» лишандик кваз спортдин фестиваль 6-сеферда кьиле фена. Ана Махачкъала, Дербент шегьеррай, Ахцегь, Акуша, Ботлих, Дербент, Докъузпара, Къули, Кьурагь, Леваши, Мегьарамдхуьруьн, СтIал Сулейманан ва Хив районрай атанвай спортсменри иштиракна.
Акъажунрин нетижада командайрин арада 1-чка – Докъузпара, 2-чка – Ботлих ва 3-чка СтIал Сулейманан районрин командайри кьуна.
Фестивалда жуьреба-жуьре заланвал авай путар хкажунай 12 йисал къведалди яшара авай гадайрин арада — Абдул Абдуллаев (СтIал Сулейманан район), 14 йисал къведалди яшара авай гадайрин арада – Мустафа Саидмегьамедов (СтIал Сулейманан район), 17 йисал къведалди яшара авай гадайрин арада Мегьамед-Тагьир Къагьриманов (СтIал Сулейманан район) гъалиб хьана. ЧIехибурун арада, 24 кг къвезвай кьве пут 5 декьикьада 62 сеферда хкажуналди, СтIал Сулейманан райондай тир Эдик Агьмедов гъалиб хьана.
Путар хкажунин спортдин жуьреба-жуьре дисциплинайрай гъалиб хьайибурун арада гьакIни Камил Мегьамедов (Леваши район), Шамил Магьдиев (Акуша район), Мурад Абдусаламов (Ботлих район), Исмаил Абдуллаев (Кьурагь район), Кьади Кьадиев (СтIал Сулейманан район), Самрат Мирзоев (Хив район), Эмин Ибрагьимов (Докъузпара район), Абдулхаликь Гьасанов (Докъузпара район), Эдик Агьмедов авай.
Мурад Абдусаламова 70 кг пут хкажунай рекорд эцигна. ГъвечIибурун арада рекорд 3-классда кIелзавай Ренат Алиева эцигна, ада 8 кг къвезвай пут 54 сеферда хкажна.
Акъажунрин иштиракчийрин вилик рахадайла, РД-дин путарин спортдин Федерациядин регьбер Магелан Саидова фестиваль тешкилунин карда куьмекар гунай Докъузпара райондин администрациядин, «Леки» фондунин, «Виадук» ООО-дин, ФЛНКА-дин ва «Медиа-маркет» туьквендин векилриз сагърай лагьана.
Спортдин мярекатдал гьакIни жемиятдинни сиясатдин машгьур деятель, меценат Мамед Абасовни рахана. Ада жегьилрик руьгь кутадай гафар лагьана ва путар хкажунай Россиядин чемпиондин тIвар къачур сад лагьай дагъустанвидиз машин пишкешун хиве кьуна.
Гъалибчийрив шад гьалара кубокар, медалар, дипломар, пулдин пишкешар ва маса савкьатар вахкана. Вири иштиракчияр патал нисинин тIуьнни тешкилнавай.
Къейд ийин хьи, РД-дин путарин спортдин Федерацияди РД-дин физический культурадин ва спортдин министерстводихъ галаз санал идалай кьулухъни путарин спортдин фестиваль вилик тухуда.
Чи мухбир
