Алай вахтунда, Россиядин­ мулкунал алай маса регионра хьиз, Дагъустандани мектебар акьалтIарнавай жегьилри, РФ-дин прос­вещенидин министерстводи ва Рос­обр­над­зорди тестикьарнавай графикдин­ бинедаллаз ЕГЭ-дин имтигьанар вах­кузва.

ИкI адан асул вахтунилай виликан пай 20-мартдилай 2-апрелдалди кьиле фена. Асул пай лагьайтIа, 1-июндилай башламишнава ва 9-июлдалди давам жеда. Имтигьанрин алава вахт – 4-сентябрдилай 25-сентябрдал кьван.

Гьа икI, 1-июндиз выпускникри тарихдай, литературадай ва химиядай ЕГЭ вахкана, 4-июндиз – урус чIалай, 8-июндиз – математикадай (бинелу ва пешекар­ де­ре­жайрин). 11-июндиз обществоз­на­ни­дай ва физикадай, 15-июндиз – биологиядай, геог­рафиядай, къецепатан чIала­рай (кхьена), гьакIни 18 ва 19-июндиз къецепатан чIа­ларай (рахана) ва информатикадай имтигьанар  вахкудайвал я.

Асул паюнин резервдин йикъарни малум я: 22-июндиз — физикадай, информатикадай, литературадай, урус чIалай, химиядай, къецепатан чIаларай (кхьена); 23 июндиз – биологиядай, географиядай, математикадай, къецепатан чIаларай, тарихдай, обществознанидай. 24  ва 25-июндин йикъа­ра вири тарсарай вахкуз жеда.

ЦIийи кьилелай вахкудай йикъар: 8-июль – къецепатан чIаларай, информатикадай­, литературадай, урус чIалай, физикадай, химиядай; 9 июль – биологиядай, географиядай, математикадай, къецепатан чIаларай, тарихдай,  обществознанидай.

Имтигьанрин кампанияда алай йисуз 14 агъзур выпускникди иштиракзава. Абурувай­ ЕГЭ вахкуз жедайвал, мектебрин бинедаллаз – асул  65 чка (ППЭ), УФСИН-дин би­не­дал­лаз – 4 чка ва сергьятламишнавай мумкинвилер авайбур патал кIвалера 4 чка  гьазурнава.

ППЭ-риз гьахьдайла, ракьухъ къекъведай тадаракар ишлемишзава. Иштиракчидиз вичив гвай шей гуьгьуьллудаказ вахкун теклифзава. Эгер и кар тавуртIа, ам къенез ахъайзавач. Химиядай имтигьан вахкудайла, иштиракчийриз Менделееван таблица, гьакIни цIрадай шейэрин ва ракьарин нап­ряженийрин таблицаярни хсуси калькулятор  ишлемишдай ихтияр гузва.

2026-йисуз аттестат къачун патал агъа кIан агъадихъ галай баллрин кьадар тайинар­нава: урус чIалай – 100 баллдикай, гьич та­хьайтIа, – 24; пешекар математикадай – 100 баллдикай, гьич тахьайтIа, – 27; бине­лу математикадай – 21 баллдикай, гьич та­хьайтIа, – 7. Выпускникрин кIвалахар сифтедай региондин делилар гьялунин центрада (РЦОИ) ахтармишзава.

ГьакIни и йикъара республикадин мектебрин 9-классар акьалтIарнавай 45 864 аялди ОГЭ-дин имтигьанар вахкузва. Мад 2 414 касди имтигьан ГВЭ-дин къайдада вахкуда. Аттестация кьиле тухун патал рес­публикада 152 ППЭ ачухнава.

Имтигьанрин кIвалах 13 тапшуругъдикай­­ ибарат я ва ам пуд патал пайнава: из­ло­же­ние, тестер тамамардай пай ва со­чи­не­ние-веревирдер. Тапшуругъар тамама­рун­ патал­ 3 сятни 55 декьикьа чара ийизва. Имтигьанрин нетижаяр 23-июндалди малум жеда. Кваз кьадай себеб аваз имтигьанда иштиракиз тахьайбурувай ам 2-июлдиз вахкуз хъжеда.

Саида Мурадова