Махсус серенжемдикай
РФ-дин Яракьлу Къуватрин «Кьиблепад» кьушунри ДНР-дин Химик посёлок азаднава. Идакай уьлкведин оборонадин министерстводи хабар гузва.
Авиациядин серенжемдин, беспилотникрин ва ракетайрин кьушунрин, артиллериядин дестейрин кьетIи гьерекатрин нетижада ВСУ-ди ишлемишзавай улакьринни энергетикадин къурулушриз, яракьар ва кудайди хуьзвай дараматриз чи аскерри бегьем ягъунар кьуна. Идалайни гъейри, Украинадин яракьлу кIеретIар ва къецепатан уьлквейрай гьакъидихъ кьунвай аскерар вахтуналди акъвазнавай 139 чкадал гьужумна. И юкъуз пилот галачиз лув гудай аппаратрин системадин кьушунрин пешекарри ЧIулав гьуьлуьн сергьятра ВСУ-дин къаравулвилин катер тергна.
ВСУ-ди гьар юкъуз чи регионрихъ вагьшивилелди гзаф беспилотникар ахъайзава. ПВО-дин такьатрин куьмекдалди тергзаватIани, абуру яшайишдин объектриз, ислягь агьалийриз зиянар гузвай дуьшуьшарни ава. 7-июндиз РФ-дин оборонадин министерстводи «Мах» мессенджерда малумарай делилралди, йифен вахтунда ПВО-дин такьатри Украинадин 140 беспилотник кьуна ва тергна. Мидяди абур Белгороддин, Брянскдин, Калугадин, Курскдин, Орелдин, Туладин областрихъ, Москвадин региондихъ, Крымдихъ, Азов ва ЧIулав гьуьлерин сергьятрихъ ахъайнавай.
СВО кьиле тухунив эгечIайдалай инихъ Россиядин Яракьлу Къуватри Украинадин 671 самолет ва 284 вертолет, зенитный ракетайрин 661 комплекс, пилот галачиз лув гудай 157827 аппарат, 29652 танк ва дяведин маса машинар, РСЗО-дин 1729 машин, артиллериядин ва маса 35253 яракь, военный махсус 62522 автомашин тергна.
Трампа гьелягь кьуна
США-дин президент Дональд Трампа Израилдин премьер-министрдиз Ирандихъ галаз женг чIугунин карда текдиз тунин къурху гана.
«За адаз лагьана: вун жуван гьерекатра гзаф мукъаят хьун герек я, вучиз лагьайтIа, лап гьа и мукьвара ам Ирандиз аксивалунин карда текдиз амукьда», – лагьана Америкадин регьберди.
Трампан гафаралди, США-динни Ирандин арада арачивалзавай вад уьлкведи адавай Нетаньяхудиз таъсир авун тIалабнава.
Бейрутдин мулкариз ягъунар кьурдалай кьулухъ, 7-июндин няниз, Иранди Израилдин мулкарал гьужумна. Къейдзавайвал, ракетайралди ягъунар кьунин макьсад Израилдин Рамат-Давид авиабаза барбатIун тир. Йифиз ва экуьнахъ кьве терефдини сада муькуьдан военный объектар, нафтIадинни химиядин карханаяр яна.
Лацу КIвалин регьбер Нетаньяхудихъ ва «Хезболладин» векилрихъ галаз телефондай рахана ва кьве терефдини ягъунар кьунин гьерекатар акъвазардайдакай хабар ганай.
Д. Трампа алава хъувурвал, идалай вилик хьиз, исятдани ам Тегерандихъ галаз икьрар кутIунунин фикирдал ала.
9-июндиз Трампа Ирандиз ягъунар кьунин гьерекатар гуьнгуьна хутаз кIанзавач лагьана. «Эгер чна мад 2-3 гьафтеда ягъунар кьуртIа, са затIни амукьдач. Амма Ормуздин пролив мад са шумуд вацра ахъа жедач. Эгер чна гьужум авуртIа, гзаф инсанар рекьида. Низ кIанзава и кар? Заз лагьайтIа, кIанзавач», – лагьана Трампа Америкадин журналистриз.
Сечкийрилай нарази я
7-июндиз Эрменистанда парламентдин сечкияр кьиле фена. Са жерге чешмейри къейдзавайвал, агьалийрин 60 процентди сечкийра иштиракна. Никол Пашинянан партиядивай цIийи гьукумат тешкилун патал герек тир 50 процентдин сесер къазанмишиз хьанач. Амма партиядиз мандатрин гьисабдай герек тир кьван чкаяр къачудай мумкинвал ава.
Эрменистандин сиясатдин маса къуватри сечкийрин нетижаяр дуьзбур тушиз гьисабзава ва гьахъ винел акъудун патал абуру 19-июндалди Конституциядин судда гьуьжет кьун мумкин я. Ихьтин фикир, «РИА Новости» чешмеди хабар гузвайвал, Эрменистандин ЦИК-дин кьил В. Овакимяна малумарна.
Къейдзавайвал, сесер гунин эхиримжи нетижаяр 14-июндиз кьада. Икьван чIавалди Центризберком гьисабар авунал, къвезвай шикаятриз килигунал машгъул жеда.
Евросоюз – къалмакъалдин терефдар
Евросоюздин такьатар Украинадиз куьмек гун патал ваъ, Россия зайифариз алахъунин макьсаддалди рекье твазвайди я. Ихьтин фикир украинви тарихчи Марта Гавришкоди малумарнава. Адан гафар «РИА Новости» чешмеди раижна.
«2026-йисан эвел кьилелай Европади Украинадиз ийизвай пулунин ва гуманитарный куьмекрин кьадар садлагьана тIимил хьана. Ахьтин фикирдал къвезва хьи, ЕС четин гьалара авай инсанриз куьмекар гуз ваъ, къалмакъалдиз гзаф куьмекар гуз гьазур я», – лагьанва тарихчиди.
Адан гафаралди, украинвияр къурбандриз элкъуьруналди, ЕС-диз Россия явашариз кIанзава.
Гьазурайди — К. Ферзалиев
