Дагъустандин Гьукуматдин Председатель Мегьамед Рамазанова 7-июндиз Махачкъала шегьердин коммунальный имаратрал кьил чIугуна. Ам ятар михьдай цIийи имаратар эцигзавай, насосрин станцияр ва коллекторар цIийикIа туькIуьр хъийизвай ва гьакIни ишлемишнавай ятар Каспий гьуьлуьз ракъурзавай имаратар авай гьалдихъ галаз таниш хьана.
Программадин кьилин объектрикай сад канализациядин ятар михьдай имарат тир. Суткада 150 агъзур куб.м ятар михьи авун лазим тир и проект алай вахтунда Дагъустанда уьмуьрдиз кечирмишзавай чIехибурукай сад я. Ам ишлемишиз вахкайла, Махачкъаладани Каспийскда чиркин ятар михьдай алай аямдин имарат арадал къведа.
Махачкъалада канализациядин ятар михьдай имарат эцигуниз талукь проектдикай премьер-министрдиз «Мостотряд 99» АО-дин генеральный директор Идрис Алиева малумат гана.
Къенин йикъалди и имаратдал гьазурлухвилин кIвалахар кьиле тухузва. Ам эцигзавай мулк михьнава, эцигунардайбурун «городок», анал фидай рекьер туькIуьрнава, чкадал эцигунардай герек шейэр, материалар агакьарзава. Гьар юкъуз эцигунрал 75 касди ва вишев агакьна техникади кIвалахзава. Гьар юкъуз эцигунрин майдандал 3,5 агъзур кубдилай виниз жуьреба-жуьре материалар гъизва.
«Гъиле кьунвай и проектди Махачкъаладин ва Каспийскдин чиркин ятар михьдай мумкинвал гуда. Гьа са вахтунда чиркин ятар михьзавай исятда кардик квай имаратдин кIвалахдин бегьерлувални артух жеда. Нетижада Каспий гьуьлуьз чиркин ятар финиз рехъ агалда», – лагьана Идрис Алиева.
Мегьамед Рамазанов Каспийск шегьерда канализациядин насосдин станция эцигзавай майдандал ва гьакI Махачкъала шегьердин 6-нумрадин ГКНС-дални фена. Премьер-министрдиз чиркин ятар михьдай имаратрин кIвалах авайдалай хейлин хъсанардай объектар цIийикIа туькIуьр хъийизвай гьал къалурна. Ам чиркин ятарихъ галаз алакъалу месэла гьялдай проектдихъ галазни таниш хьана.
Ихтилат физвай вири имаратар сад-садахъ галаз сихдаказ алакъалу я, абуру технологиядин сад тир комплекс арадал гъизва. Вири санал ишлемишиз вахкайла, чиркин ятарин месэлани гьялда.
Махачкъала шегьерда эцигзавай кьуд вишелай агъзур миллиметрдив агакьна диаметр авай канализациядин коллекторар (абуру суткада 65,3 агъзур кубометр яд ахъайда) эцигзавай подрядчик «Современные системы реновации» ООО я. Объектдал алай вахтунда канализациядин сетар эцигзава. Абуру шегьердин Ленинский райондин чиркин ятар михьдай имаратриз агакьарда. Каспийск шегьердин КНС-дин подрядчик «Ленгидропроект» АО я. Ада вичин кIвалахар йисан эхирдалди куьтягьда.
«Чиркин ятар михьдай имаратдай михьи яд гьуьлуьз ахъаюн патал эцигзавай объект» технологиядин жигьетдай пара муракабди я. ГьикI лагьайтIа, адан са пай гьуьлуьн къене эцигна кIанзава. И кардал «Современные системы реновации» ООО машгъул жезва.
Махачкъала ва Каспийск шегьерар патал важиблу объектрал фейила, премьер-министрди абур вири галай-галайвал эцигунин ва вахтунда ишлемишиз вахкунин месэладиз кьилин фикир гана.
Пешекаррин гафаралди, гъиле кьунвай кIвалахар куьтягьайла, республикадихъ алай аямдин экологиядин истемишунриз жаваб гудай чиркин ятар михьдай ва Каспий гьуьлуьз михьи яд ахъай хъийидай имаратар жеда.
Идахъ галаз сад хьиз Дагъустандин коммунальный къурулушни цIийикIа туькIуьр хъувунин карда са кам вилик къачуда, Махачкъала, Каспийск шегьерар ва абурун мулкар мадни вилик тухудай шартIар арадал къведа.
Мегьамед Рамазанова талукь вири идарайрин кьилерал эцигунрал датIана гуьзчивал тухун ва кIвалахдиз кьецI гузвай нукьсанар вахтунда арадай акъудун тапшурмишна.
Гьа и юкъуз М. Рамазанов «Чиркей-Махачкъала-Каспийск» магистральный водовод эцигзавай гьалдихъ галазни таниш хьана. И проект кьилиз акъудайла, кьве шегьердин агьалияр тамамвилелди хъвадай целди таъминарда.
Республика патал важиблу эцигунрихъ галаз таниш жедайла, премьер-министрдихъ гьакI «Фонд развития территорий» ППК-дин директор Анвар Шамилов, РД-дин эцигунрин ва ЖКХ-дин министрдин везифаяр вахтуналди тамамарзавай Бахтияр Уллаев, РД-дин Халкьдин Собранидин депутат Хучбар Хучбаров ва масабур галай.
Хийир Эмиров
