9-июндиз Къизилюрт шегьердин мулкара, Бавтугай поселокдиз мукьва, газдин «Моздок – Къазимегьамед» магистральный турбадал авария арадал атана: адай газ ахъа хьунин нетижада цIай кьуна.
Республикадин ва талукь министерствойрин кьилевайбуру арадал атанвай гьал гьасятда кьетIен гуьзчивилик кутуна. РД-дин Гьукуматдин Председатель Мегьамед Рамазанован буйругъдалди РД-дин энергетикадин ва тарифрин министр Марат Шихалиев Къизилюрт шегьердиз фена.
Энгел тавуна кьабулай серенжемрин нетижада турбадиз газ ахъаюн вахтуналди агална. Дуьшуьш арадал атанвай чкадай 140 кас хатасуз чкайриз акъуднавай. Алай вахтунда абур элкъвена чпин кIвалериз хтанва. Зиян хьайибур авач.
Исятда турбадал ремонтдин кIвалахар кьиле физва. Абур тахминан пуд юкъуз давам жеда. Арадал атанвай гьал РД-дин Кьилин везифаяр вахтуналди тамамарзавай Фёдор Щукинан гуьзчивилик ква.
«Лезги газет»
