Дагъустандин военкомдин малуматдай аквазвайвал, призывдин кIвалах хъсандиз тешкилнавайбурук Кьиблепатан Дагъустандин я шегьерар, я районар акатнавач. ИкI ятIани, анра вахтунда ва планда къалурнавай кьадар жегьилар армиядин жергейриз ракъурзавай кIвалах акъвазарнавач.
Идан гьакъиндай Кьурагь райондин администрацияда кьиле фейи мярекатди шагьидвалзава. Муниципалитетдин кьил Замир Азизован регьбервилик кваз кьиле фейи заседанидал Кьурагь ва СтIал Сулейманан районрин военком Райзудин Женетова кьве райондани гатфарин призыв виликамаз туькIуьрнавай вахтарин ва пландин бинедаллаз тамамарзавайдакай лагьана. Армиядин жергейриз эвер гузвай жегьилрин патай наразивилер авач. Военкоматдин къуллугъчийри абур вири месэлайрин гъавурда твазва.
Заседанидал Замир Азизова къейд авурвал, призывдин комиссияди законрин вири истемишунар ва тайинарнавай вахтар фикирда кьуна кIвалахзава. Амма бязи хуьрерин администрацийри и месэла гъиляй ахъайнава. Гьавиляй анра герек серенжемар кьабул хъийида ва призывдин месэладал кIеви гуьзчивал ийида. Жавабдарвал хиве авай ксаривайни истемишда.
Райондин администрациядин кьил Замир Азизова чкайрал алай военный учетдин къуллугъчийрал чпин вилик эцигнавай везифаяр вахтунда кьилиз акъудун патал кIвалахдик йигинвал кутун тапшурмишна.
Абад Азадов
