И йикъара къвайи къати марфари Кьурагь райондин бязи хуьрерин агьалийрикни къурху кутуна. Муниципалитетдин администрациядин пресс-къуллугъди хабар гузвайвал, Гуьлгери вацIа цин дережа хкаж хьуникди аранда авай Къумухърин хуьруьн мулкара кьвал уьцIуьнин хаталувал арадал атанва. Вахтунда и кардин вилик пад кьун тавуртIа, чкадин агьалийрин майишатар, хуьруьн инфраструктура патал хаталувал арадал къведа.
Арадал атанвай гьаларихъ галаз мукьувай таниш хьун патал Къумухърин хуьруьз РД-дин Халкьдин Собранидин депутат Девлетхан Алиев фена. Ина ам хуьруьн администрациядин кьил Расул Агъаметовахъ ва Украинада кьиле физвай махсус серенжемдин иштиракчи Къайибулах Гьамзатовахъ галаз санал вацIун кьерез фена, арадал атанвай гьалариз къимет гана.
Нетижада Девлетхан Алиева герек тир серенжемар кьабулун патал РД-дин экологиядин ва тIебиатдин ресурсрин министерстводиз Къумухърин хуьре арадал атанвай гьаларикай хабар гана. Хаталувилин вилик пад кьун патал, махсус техника желбна, вацI маса чкадай авахьдайвал авун герек я. И кIвалах депутатди вичин хсуси гуьзчивилик кутунва.
Агьмед Магьмудов
