Майдин эхирра Суздаль шегьерда грекринни римлуйрин жуьреда кьуршахар кьунай Россиядин 2026-йисан чемпионат кьиле фена. Чи ватанэгьли Анвар Аллагьярова чемпионвилин тIвар къазанмишна.
«ТIарвал себеб яз, акъажунрикай са кьадар вахтунда къерех хьанвай Европадин чемпионатдин гимишдин призёр Анвар Аллагьярова акъажунра 60 килограммдин заланвал авайбурун арада вичин устадвал къалурна. Финалда ам Европадин ва дуьньядин чемпион Садык Лалаевахъ галаз гьасиррал экъечIна. Техникадин хъсан алакьунар къалуруналди (гьам партерда ва гьамни стойкада), ам инанмишвилелди гъалиб хьана. Спортдин лап хъсан къайдадиз хтун патал адаз Аллагь куьмек хьуй!», – къейдна акъажунрилай кьулухъ грекринни римлуйрин жуьреда кьуршахар кьунай уьлкведин хкянавай командадин кьилин тренер Николай Монова.
Шарвилидин халис неве тир ахцегьви Анвар Аллагьяроваз и чIехи агалкьун чна, районэгьлийри, рикIин сидкьидай мубаракзава. Чи мурад адакай дуьньядин ва Олимпиададин чемпион хьун я, иншаллагь!
Дашдемир Шерифалиев
