Кьисасдин ягъунар

2-июндин экуьнахъ «РИА Новости» чешмеди хабар гайивал, Россиядин кьушунри Украинадин военно-промышленный комплексдин карханайриз кьисасдин ягъунар кьуна.

«Цавай, чилелай, гьуьлелай яргъал мензилдиз фидай дуьм-дуьз яракьрин, пилот галачиз лув гудай аппаратрин куьмекдалди Украинадин оборонадин промышленностдин комплексдиз Киевда, Запорожьеда, Харьковда, Днепропетровск­да­, гьакIни ма­са областра ВПК-дин карханайриз еке ягъунар кьуна», – кхьенва РФ-дин оборонадин министерстводин малуматда.

Къейдзавайвал, аскерри ВСУ-ди ишлемишзавай военный аэродромриз, кудай затIарин ва улакьрин къурулушрин объект­риз ягъунар кьуна. Министерстводин малуматда къейднавайвал, кьисасдин ягъунар кьун патал вилик эцигай вири тапшуругъар макьсаддив агакьна.

ВСУ-ди Луганскдин Халкьдин Республикадин Старобельск­да террориствилин гьерекат кьилиз акъудайдалай кьулухъ миллетбазрин, боевикрин гьерекатри «сабурдин къаб кьадардилай артухни ацIурнавайдакай» Россиядин МИД-ди лагьанай. Гуьгъуьн­лай РФ-дин ВС-ди вагьшивилин гьерекатрин къарарар кьабулзавай чкайрал ва военный маса объектрал гьужум авун хиве кьунай.

РикIел хкин, 22-майдин йифен вахтунда Украинадин миллетбазри Старобельскда теракт кьилиз акъудна: колледждин студентар ва къуллугъчияр авай дараматар самолетдин жуьредин беспилотникралди яна. Гуьгъуьнлай аниз са жерге уьл­квейрай журналистар фена, ВСУ-дин гьерекат акьалтIай вагьшивилинди тирди тестикьарна. РФ-дин Президент Владимир Путина жавабдин гьужум кьилиз акъудун патал оборонадин министерстводиз теклифар малумарунин тапшуругъ ганай.

Дуьньядин са жерге СМИ-ри ВСУ-дин гьерекатар негьзава. «Эгер куьне, мукьвал-мукьвал «яру часпарар» какадариз, женг чIугвазвайбуруз датIана хъел гъидай крар ийиз хьайитIа, са шумудра тагькимарайдалай кьулухъ абурун сабур акьалтIун мумкин я», – кхьенва къецепатан уьлквейрин са чешмеда.

Китай нарази я

Японияди чпин аскерар Украинадин хатасузал хуьнин ва вердишвилер гунин макьсаддалди НАТО-дин къурулушриз ра­къуруни Китайдик бегьем къалабулух кутунва. «РИА Новости» чешмеди хабар гузвайвал, ихьтин фикир Китайдин МИД-дин векил Л. Цзяна малумарнава.

«Японияди НАТО-дихъ галаз амадагвал еримлу авунин гьерекатар чна фикир гана кIанзавайбур, къалабулух кутазвайбур яз гьисабзава. Им Япониядин конституциядалди тайинарнавай сергьятрай, международный ихтияррай ва къенепатан къанунрай экъечIун я…», – къейднава дипломатди.

Адан гафаралди, Токиоди ийизвай ихьтин гьерекатар ислягьвал кIанзавай уьлквединбуруз ухшарбур туш.

НАТО-ди Украинадиз военный рекьяй гузвай куьмекдихъ галаз таниш хьун патал Япониядин оборонадин министерст­води Германиядиз кьуд офицер ракъурун кьетIнавайдакай 29-майдиз малум хьана. Гьа са вахтунда гуьгъуьнлай Япониядин оборо­надин министерстводи къейд авурвал, офицерар нем­серин базада жеда ва женгерин гьакъикъи гьерекатра абуру иштиракдач.

Рахунар давам жезва

США-дин президент Дональд Трампа Ирандихъ галаз ра­хунар­ давам жезва лагьана. Идакай «РИА Новости» чешмеди хабар гана­.

Идалай вилик «Tasnim» агентстводи Иранди США-дихъ галаз чарар, фикирар сада-садал агакьарунин серенжем, Израилди Ливанда ийизвай чIуру гьерекатар себеб яз, акъвазарнавайдакай хабар ганай.

Ихтияр ганвач лугьузва

Литвадин премьер-министр И. Ругиненеди Россиядиз беспилотникралди ягъунар кьун патал Украинадиз Прибалтикадин уьлквейрин мулкар ишлемишдай ихтияр ганва лугьун гьакъи­къатдив кьан тийизвай фикир я лагьана.

«Чна якъиндиз ва жавабдарвилелди малумарнай ва мад сеферда тикрар хъийизва: Прибалтикадин уьлквейри Россиядин объектар беспилотникралди ягъун патал Украинадиз цавун бушлухар ва мулкар ишлемишунин патахъай садрани ихтиярар гайиди туш», – лагьанва премьер-министрди. Адан гафар «РИА Новости» чешмеди раижнава.

Украинадиз чпин мулкарикайни цавун бушлухрикай менфят къачунин ихтиярар гуя таганвайди апрелдиз Эстониядин, Латвиядин ва Литвадин гьукумдарри тестикьарнай.

«Лезги газет»