28-майдин экуьнахъ къати марфар къунин нетижада СтIал Сулейманан райондин тарихдин надир имаратрикай сад яз гьисабзавай Кьасумхуьруьн 17 тагъдикай са шумуд тамамдиз чкIана. ЦIувайни вацIувай Аллагьди вичи хуьрай гьавайда лугьузвайди туш.
Кьабулна кIанзавай серенжемар веревирд авун патал и юкъуз муниципалитетдин администрацияда Саид Темирханован регьбервилик кваз тIебиатдин бедбахтвилерин нетижаяр арадай акъуддай комиссиядин заседание кьиле фена. Сифте нубатда хатасузвал таъминарун патал муьгъ кьве кьиляйни агалдай къарар кьабулна. Жавабдар идарайрин векилри муькъуьн сагъзамай тагъар гьи гьалда аватIа ахтармишна.
И юкъуз дуьшуьш арадал атанвай чкадал РД-дин Халкьдин Собранидин депутат Имам Яралиевни фена. Ада муькъуьхъ тарихдин метлеб авайди, ам архитектурадин кьетIен, надир имарат тирди къейдна. Депутатди гьакIни хабар гайивал, герек идараяр, ксар, вири къуватар желбна, муьгъ мукьвал девирда цIийикIа туькIуьр хъийидайвал я.
Кьасумхуьруьн 17 тагъдикай ибарат муьгъ Чирагъ вацIал ала. Адан яргъивили 250 метр тешкилзава. Асул гьисабдай ада Кьасумхуьруьн кьве пай сад-садахъ галаз алакъалу ийизва. ГьакIни и муькъвелай Кьурагь, Хив, Агъул районрин хуьрериз физ жезва. Экуьнин сятдин 7-далай нянин сятдин 4-далди улакьар анжах са патаз физва, йифен вахтунда – кьве патазни. Муькъуьн гьяркьуьвилел 3 метр ала.
Тарихдай малум тирвал, и надир муьгъ эцигунин теклиф Куьре округдин председатель хьайи Алкьвадар Алискендера ганай. Эцигунрин кIвалахар Дербентдай тир инженер Николай Каспарянан регьбервилик кваз кьиле фена. Ам 1926-йисуз эцигна акьалтIарнай. ЦIийи муьгъ кардик акатун куьревийри чIехи сувар хьиз къейднай.
Агьмед Магьмудов
