Дагъустандин Кьилин везифаяр вахтуналди тамамарзавай Федор Щукина 2-июндиз совещание кьиле тухвана. Анал агьалийрин арзайриз килигзавай гьалдиз, зирзибилдин майданар контейнерралди таъминаруниз ва цихъ галаз алакъалу имаратар хуьниз, ишлемишуниз талукь месэлаяр гьялна.
РД-дин Кьилин ва Гьукуматдин Администрациядин регьбер Махач Омарова малумат гайивал, майдиз ЦУР-дин социальный сетриз 9,5 агъзур арза атана. Алатай вацрав гекъигайла, и рекъем 56 процентдин агъуз я. Арзайрин чIехи пай республикадин шегьеррин куьчеяр, рекьер авай чIуру гьалдиз ва ЖКХ-диз талукьбур тир. Вири арзаяр кIвалах хъсанарун патал муниципалитетриз ва агьалияр герек ресурсралди таъминарзавай идарайриз рекье тунва.
Махач Омарова кIватI хьанвайбурун фикир социальный сетриз акъатнавай бязи малуматрал желбна. ИкI, сетра етим Мегьамедфазил Курбетов куьчеда яшамиш хьуниз мажбур хьанвайдакай хабарар акъатнавай. Адаз 2026-йисан майдалди яшайишдин кIвал гун лазим тир. Махачкъаладин администрацияди етимдихъ галаз гуьруьш тешкилна. КIвалин месэла гьялдалди, Мегьамедфазил Курбетов вахтуналди яшамиш жедай кIвал чара авунва. Адаз гьакI образование къачудай ва кIвалах жагъурдай мумкинвални гуда.
Меркездин агьалийри Тарки-Тау дагъдилай шегьердиз килигзавай майдандал физвай рехъ ва къваларив гвай кIвалер алай чилни уьцIедай гьалда авайдакай арза авунвай. Шегьердин администрацияди месэла гьялдай серенжемар кьабулзава. Талукь смета Россиядин минтрансдиз рекье тунва.
Ногъай райондин агьалийри Къизляр – Терекли-Мектеб рекьин кьве участок лап чIуру гьалдиз атанвайдакай хабар гана. «Дагестанавтодор» идарадин пешекарри къейднавай участокар ремонт авунин кIвалахар гъиле кьунва.
Махач Омарован ихтилатрихъ яб акалайдалай гуьгъуьниз Федор Щукина жавабдарвал хиве авай ксарал етим гада яшайишдин кIвалелди таъминаруниз талукь месэла гьялуникай вичиз хабар гун тапшурмишна.
Регионда зирзибил вегьедай контейнеррин майданар туькIуьрунин месэладикай РД-дин тIебиатдин ресурсрин ва экологиядин министрдин къуллугъ вахтуналди тамамарзавай Ратмир Расулова ихтилатна. 2025-йисуз вири муниципалитетри дорожный картаяр тайинарна ва 1578 майдан туькIуьрна. Абур патал 6373 контейнер маса къачуна. Гъилевай йисуз 1114 майдан туькIуьрда ва 4129 контейнер маса къачуда. 2026-йисан 4 вацра регионда 245 майдан пайда хьана.
Апрелдин вацра контейнеррин 100 майдан туькIуьрна ва Къизилюрт, Агъул районра 8 майдан цIийикIа туькIуьр хъувуна. Бабаюрт районда 2-дан чкадал 10 майдан арадал гъанва. Гьа са вахтунда 59 майдан туькIуьруниз талукь вахтар яргъал вегьенва. Лугьузвайвал, себеб тIебиатдин татугай гьаваяр я. «Яру зонада» Тарумовский, Къайтагъ ва Дахадаев районар ава.
Ф. Щукина ихьтин гьалдилай наразивална. «Хейлин муниципалитетри тайинарнавай планар кьилиз акъудзавач. Бязи муниципалитетра кIвалахдин еришар зайифбур я. Зун гъавурда акьазва, бязи муниципалитетриз кIвалахиз гьавайри манийвал гана. Абур гила алатнава. Гьавиляй вилик эцигнавай везифаяр, са куьнизни килиг тавуна, кьилиз акъудна кIанда», – лагьана республикадин регьберди.
Ада гьакIни алава хъувуна: «Зирзибилдин майданар Байконурдин космодромар туш. Абур туькIуьриз са четинвални авач, гежел тевгьена вири чкайра зирзибил вегьедай майданар тешкилун герек я. Эгер чна республикадин агьалийривай хабар кьуртIа, и кардай абуру анжах «2» ва я «1» къиметар гуда.
Совещанидал цихъ галаз алакъалу имаратар авай ва ишлемишзавай гьални веревирдна. РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Бахтияр Уллаева лагьайвал, эхиримжи вад йисуз, республикадин инвестицийрин программайрин сергьятра аваз, 44 имарат эцигна. 26 объект ишлемишиз вахкана. Анжах 4 объект патал тарифар тайинарнава. Цин вири имаратри лазим тирвал кIвалахзава. Гъилевай йисуз цихъ галаз алакъалу 30 имарат эцигун патал такьатар пландик кутунва. Йисан эхирдалди 14 объект ишлемишиз вахкуда.
И месэладиз баянар гудайла, Федор Щукина гьукумдин органрин регьберривай кIевелай хабар кьадайди къейдна. «Цихъ галаз алакъалу объектар вахтунда ишлемишиз вахкун тавуртIа, жавабдарвал хиве авай ксар къуллугърикай азадда», – лагьана Федор Щукина.
Хийир Эмиров
