23-26-майдин йикъара Дагъустандин мулкунал булдаказ марфар къунин нетижада республикадин автомобилрин шегьрейрин кьуд участокда гьерекат вахтуналди акъвазарнава, хабар гузва РД-дин транспортдин ва рекьерин майишатдин министерстводи.
Кьурагь районда, хабар гузвайвал, пуд хуьр улакьдин алакъадикай атIанва. «Кьурагь – Усугъ – Хвереж» Хпуькьрин хуьруьз фидай рехъ» участокдин 9-километрда, Хпежчай вацIа цин дережа хкаж хьун ва яд ахъайзавай турбаяр ци тухун себеб яз, гьерекат акъвазарнава. Ина вахтуналди фидай рехъ туькIуьрунин кIвалахар кьиле тухузва.
«Кьасумхуьр – Кьурагь» Бахцугърин хуьруьз фидай рехъ» участокдани, Кьурагь вацIа цин дережа хкаж хьун себеб яз, гьерекат агалнава. Транспортдин алакъа авачиз ина са хуьр ама. Рекьера гьерекат кардик кухтунин кIвалахар цин дережа агъуз аватайдалай гуьгъуьниз башламишда. Вахтуналди фидай рехъ 27-майдиз ачухдайвал я.
27-28-мартдиз ва 4-5-апрелдиз булдаказ къвайи марфарин нетижада чӏур хьанвай участокрикай рахайтIа, 26-майдин делилралди, 17 участокда гьерекат агална амазма. Абурун чкадал вахтуналди маса рекьер туькIуьрнава. Хабар гузвайвал, вири чкайра рекьер туькӏуьр хъувунин кӀвалахар кьиле тухузва.
Саида Мурадова
