26-майдиз Дагъустандин мектебра эхиримжи зенг ягъунин мярекат кьиле фена. Алай йисуз республикадин мектебрин 11-классар 11 агъзурдалай гзаф, 9-классар 46 агъзурдалай гзаф аялри акьатIарзава.
РД-дин образованидин ва илимдин министрдин везифаяр вахтуналди тамамарзавай Ягья Бучаева, выпускникрихъ элкъвена, тебрикдин ва насигьатдин келимаяр лагьана.
«Эхиримжи зенг – им неинки мектебра кIелунин йисар акьалтIарзавай эхиримжи югъ я, ада гьакIни куьне чIехи уьмуьрдиз сифте камар вегьин лишанламишзава. Гьихьтин рехъ куьне хкягъайтIани, – мектебра 10-классра кIелун давамарун, колледждик ва я уьлкведин вузрик экечIун – рикIел хуьх: Дагъустандиз куь бажарагъ, рикIин гьевес ва викIегь фикирар-теклифар герек я. Четинвилерихъай кичIе жемир, умудлудаказ виликди алад, жуван къуватрихъ инанмиш хьухь», – лагьана ада.
Саида Мурадова
