Старобельскда хьайи терактдикай

Алатай жуьмядиз ЛНР-дин кьил Л. Пасечника Старобельск­дин колледждин тарсар гузвай ва студентар яшамиш жезвай дараматрал ВСУ-ди гьужум авурдакай малумарнай. Мидяди йифен вахтунда 86 студент ва къуллугъчияр авай общежитидал самолетдин жуьредин беспилотникар ахъайна. Нетижада 21 кас кьена, 60-далай гзаф ксариз хасаратвилер хьана. Идакай са жерге чешмейри хабар гана.

24-майдиз къецепатан уьлквейрин 50-далай гзаф журна­листар му­сибатдин агьвалат кьиле фейи чкадал фена. Л. Пасечника журналистриз ихтилат авурвал, ВСУ-ди ислягь агьалияр яшамиш жезвай объектриз дронралди мукьвал-мукьвал ягъу­нар кьазва.

Старобельскдиз 19 уьлкведай журналистар фенва, гьа жергедай яз США-дай, Бразилиядай, Финляндиядай, Германиядай­, Туьркиядай.

«Виликамаз гьазурвал акуна, къастуналди гзаф инсанар кьин патал кьилиз акъуднавай кар я им», – кхьенва Ирландиядай тир журналист Ч. Боуза.

«Им ислягь инсанар яшамиш жезвай дарамат я. Заз рушарин затIар, игрушкаяр акуна. Залан мусибат я», – С. Халаф, «Aль Арабия» телеканалдин мухбир.

«Дуьнья, кьилди къачуртIа, РагъакIидай пад вучиз кисна­ватIа, зи кьил акъатзавач. Абуруз дуьньядиз халисан Украина къалуриз кIан хьанвач. Абуруз Украинади ислягь аялар кьенвай делил къалуриз кIан хьанвач», – Е. Аджар, Туьркия.

«Заз инал колледж хьайиди ва ина инсанар кьейиди аквазва. Гьелбетда, рикI къарсурдай агьвалат я», – Д. Пигни, Италия.

Киевди кьилиз акъудай теракт негьзавай журналистрин кьадар гзаф я.

Госдумадин депутат Я. Лантратовади «Звезда» телеканалдиз малумарайвал, Старобельскдин колледжда аялар кьейи дронрин компонентар РагъакIидай пата арадал гъизвайбур я, гьавиляй кьейибурун патахъай жавабдарвал гьанин хиве гьатзава.

ВСУ-дин акьалтIай вагьшивилин гьерекатдиз талукь яз РФ-дин Президент Владимир Путина къейд авурвал, гьужум дуьшуьшдинди тушир. Адан гафаралди, гьужум пуд лепедикай ибарат тир: ВСУ-ди 16 беспилотникдалди гьа са чка яна.

«Киевда гьукум чапхуннавай цIийи миллетбазрин режимди Старобельскдин колледждин студентрин общежитидиз террориствилин ягъунар кьуна. Йифиз, студентар ксанвай вахтунда», – лагьана В. Путина 22-майдиз «Игитрин вахт» программадин сад лагьай паюнин выпускникрихъ галаз гуьруьш кьиле фейи вахтунда.

Президентди жавабдин гьужум авунин жигьетдай оборонадин министерстводиз теклифар малумарунин тапшуругъ ганай.

Махсус серенжемдикай

РФ-дин «РагъэкъечIдай пад» кьушунрин дестеди мидядин оборонадихъ гьерекат авун давамарзава. И дестеди Днепро­пет­ровскдин областдин Гавриловка, Малиновка, Катериновка ва маса хуьрера, Запорожьедин областдин Новониколаевка, Терсянка, Лесное ва Любицкое хуьрера мидяйриз, абурун техникадиз, гьужумдин ва десантдин пуд кIеретIдиз ягъунар кьуна.

Чи кьушунрин «Днепр» дестедини Запорожьедин областдин хуьрерин мукьув гвай мулкара ВСУ-дин 2 бригада тергна.

24-майдиз РФ-дин оборонадин министерстводи «Мах» мессенджерда малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 671 самолет ва 284  вертолет, зенитный ракетайрин 661 комп­лекс, пилот галачиз лув гудай 151824 аппарат, 29468 танк ва дяведин маса машинар, РСЗО-дин 1725 машин, артиллериядин ва маса 35075 яракь, военный махсус 62415 автомашин тергна.

Къалмакъалдик кутаз кIанзава

«Маса Украина» тешкилатдин советдин председатель         В. Мед­ведчука малумарнавайвал, В. Зеленский Белоруссия «къал­макъалдиз ялиз алахъзава». Медведчука къейднавайвал, РагъакIидай пата Минскдик цIай кутунин патахъай тапшуругъ ганва. Адан гафар «РИА Новости» чешмеда чапнава.

Эгер Зеленскийдиз рахаз ва я меслятар къачуз кIанзаватIа, Белоруссиядин президент А. Лукашенкоди вич адахъ галаз гуьруьш кьиле тухуз гьазур тирди лагьанай. Ада гьакIни Киевдай бязибуру ийизвай «лагълагъриз» вичи фикир тагузвайди къейднай. Лукашенкоди Минск Украинада авай къалмакъалдик шерик жезвач лагьана тестикьарнава.

Адан фикирдалди, Белоруссия дяведик кутунин нетижада Зеленскийди алава пулар гъиле гьатуник умуд кутазва.

Гьазурайди — Ку. Ферзалиев