Дагъустандин Кьилин везифаяр вахтуналди тамамарзавай Федор Щукин 25-майдиз региондин карчийрихъ галаз гуьруьшмиш хьана. Россиядин карчийрин югъ къейд авунин лишандик кваз кьиле тухвай гуьруьшда республикадин премьер-министр Мегьамед Рамазанова, гъвечIи ва юкьван бизнесдин векилри иштиракна.
Федор Щукина бизнесменриз сувар тебрикна. Иллаки ада чпин хивез яшайишдин месэлаяр къачуз зегьмет чIугвазвай карчийриз сагърай лагьана. Абуру тIебиатдин бедбахтвилер алудунин, СВО-дин иштиракчийриз ва абурун хизанриз куьмекар гунин крара иштиракзава.
«Гьукумдиз и хъсан крар аквазва ва абуруз кутугай къиметни гузва. Чна санал кIвалахунин вахтунда куьне ийизвай къени крарни фикирда кьада», — алава хъувуна Ф. Щукина.
Республикадин регьберди гуьруьш ачух жуьреда кьиле фидайвал тешкилна. Адани Дагъустандин премьер-министрди, бизнесдин векилриз жавабарни гуз, йикъан месэлайрикай суьгьбетна.
«И гуьруьш куь кIвалахда гьалтзавай месэлайриз, вилик акъвазнавай везифайриз бахшнавайди я. Куьне республикадиз жезмай кьван гзаф хийир гъун патал кIвалахдин къулай шартIар тешкилун гьукумдин хиве гьатзава. Гьавиляй чаз къе квек секинсузвал кутазвай вири месэлайрикай чир хьун лазим я», — лагьана республикадин Кьилин къуллугъ вахтуналди тамамарзавай Щукина.
Полимердин турбаяр акъуддай заводдин векил Низам Балакеримова Федор Щукиназ чпин заводдиз атун теклифна, ада теклиф хушвилелди кьабулна.
«Куь карханадихъ галаз таниш хьунал зун шад жеда. Заводда чна талукь тир гуьруьшни кьиле тухуда. Квез гьукуматдивай гьихьтин куьмек кIанзаватIа, дуьзгуьн теклифар гьазура», — лагьана Федор Щукина.
СКФО-да чIехи карханайрикай сад тир «Эксонорди» 2024-йисалай кIвалахзава, хуьруьн майишат, цин, газдин, электроэнергетикадин идараяр, карханаяр патал турбаяр акъудзава. И проектдиз 3 миллиард манат харжнава.
«Россиядин даяхар» компаниядин векилди регионда бизнес ачухдиз, законлудаказ кардик хьунин кIвалах гьи къайдада тешкилзаватIа, гьадакай хабар кьуна. Республикадин регьберди лагьайвал, и везифа стратегиядин метлеб авайди я. Республикадин гьукум бизнес хъендикай хкудунин, адаз кIвалахдай къулай шартIар тешкилунин терефдар я. Къенин гуьруьшни и жигьетдай фикирар, теклифар чирун патал тешкилнава.
«Карчи Россия» компаниядин чкадин отделенидин председатель Русланбег Гьажимагьамаева региондин регьбердивай бизнес-институтдин кьисметдин гьакъиндай хабар кьуна. Федор Щукина и месэладиз талукь яз малумарна: «Муниципалитетра карчивал, бизнес вилик тухунин патахъай жаваб гузвай заместителар ава. Гьакъикъатда лагьайтIа, абурун патай карчийрив куьмек агакьзавач. И месэладикай чаз хабар ава ва чна хъсан патахъ дегишвилер твада».
Дагъустандин премьер-министр Мегьамед Рамазанова бизнес вилик тухун патал къулай шартIар тешкилунин игьтияж авайдакай малумарна. «Чун сифте нубатда бизнесдал машгъул ксариз куьмекчияр хьана кIанда», — лагьана ада. Ада алава хъувурвал, гьукумдин органри намуслудаказ, ачухдаказ зегьмет чIугвазвай карчийриз вири терефрихъай куьмек гун лазим я.
Гуьруьшдал гьакI бизнесдинни алишверишдин сетрин компанийрихъ галаз авай алакъайриз талукь месэладикайни ихтилат кватна. Республикадин регьберди къейд авурвал, чкадал жуьреба-жуьре шейэр акъудзавай, гьасилзавай ксарин тереф хуьн ва абуруз сетрин чIехи туьквенрай маса гудай мумкинвилер тешкилун кьилин везифайрикай сад я.
Акъудзавай суьрсет маса гудайла, гьалтзавай четинвилерикай консервиярдай «ПОШ» ООО-дин иеси Павел Тарасова лагьана. Компаниядихъ зейтундин багъ кутадай фикир ава. Премьер-министр Мегьамед Рамазанова лагьана: «Гуьруьшдилай гуьгъуьниз чун туьш жеда, чун республика патал хийирлу гьар са кардин тереф хуьз гьазур я».
Суьгьбет кьиле фидайла, карчийри чпин агалкьунрикай ва кIвалахда гьалтзавай четинвилерикай ихтилатна. Крар вилик тухун патал хейлин теклифарни гана.
Гуьруьшдин эхирдай кIвалахда тафаватлу жезвай карчийриз шабагьар гана.
Финансрин «ЛяРиба» компаниядин генеральный директор Мурад Алискерова Федор Щукин ва Мегьамед Рамазанов бизнес-жемиятдихъ галаз гуьруьшмиш хьуниз вичин баянар гана. Ада лагьайвал, гьукумдин векилар карчийриз къулай шартIар тешкилиз гьазур я.
Хийир Эмиров
