Алай девирда дидед чIаларин муаллимрин хиве авай везифа муракабди я. Тарс гузвай аялриз хайи чIал кIанарун, ам хуьн патал зегьмет чIугун — и месэлаяр кьилиз акъудун патал гьакъисагъдаказ зегьмет чIугвазвай муаллимрикай сад Белиждин 1-нумрадин мектебдин дидедин чIаланни литературадин кьилин дережадин муаллим, РФ-дин образованидин гьуьрметлу работник, РД-дин лайихлу муаллим, шаир Ибрагьимова Гъулангерек Гьажиевна я.
Адан кIвалахдин къайдайрикай, иллаки тарсарикай-гуьруьшрикай неинки Белижда, гьакI Кьиблепатан Дагъустандани малум я. Абур са шумудра Белиждин телеканалрайни ганай. Ингье и йикъара адан ихьтин мад са тарсуниз фин кьисмет хьана. РФ-дин президентди малумарнавай Россиядин халкьарин садвилин йисан сергьятра аваз, Гъулангерек Гьажиевнади эдебиятдин нубатдин межлис хъсандиз безетмишнавай кабинетда тухвана.
Мярекатда жегьил шаир, «Кард» журналда кIвалахзавай ва ГТРК-дин «Вахтар ва инсанар» передача кьиле тухузвай Владик Батманова, «РД-дин искусствойрин лайихлу деятель», композитор ва журналист тир и цIарарин авторди, хореограф Сефербег Сефербегова, гьакIни 1-нумрадин мектебдин директор Имара Заловади, эдебиятдал рикI алай муаллимри ва аялри иштиракна. Эдебиятдин межлис ачухуналди, И. Заловади мярекатдиз атанвай мугьманрин тIварцихъ хуш келимаяр лагьана. Ахпа ада Гъулангерек Гьажиевнадиз гележегда мадни чIехи агалкьунар хьун алхишна.
Мярекат устаддаказ Гъулангерек Гьажиевнади тухвана. Са сятина давам хьайи ам гзаф таъсирлудаказ кьиле фена. Сценарий муаллимди жуьреба-жуьре риваятралди, суьгьбетралди, аялри хуралай кIелай Владик Батманован шиирралди, аялрин «Кавха» ансамблди авур кьуьлералди чIагурнавай. Аялар ашкъиламишунин мураддалди заз анал устаддаказ шиирар кIелай Бутаева Хадижадин, Рамазанова Камиладин, Бутаева Аминадин, Алиева Камиладин, Шафиева Эсмирадин, Шафиев Мусадин, Шафиев Абдулалиман тIварар кьаз кIанзава. Эдебиятдал рикI алай аялри шаирдиз суаларни гана.
«Къе зун и мярекатда иштиракунал гзаф шад я. Иллаки Гъулангерек Гьажиевнади шииррихъ галаз алакъа авуна туькIуьрнавай композицияди, ада, артисткади хьиз, сесни дегишариз авур суьгьбетри зун мадни мягьтеларна. Балаяр, ихьтин муаллим квехъ хьунал зун гзаф шад я. Мадни хайи чIалал рикI хьухь, ам хуьх! Мярекатда иштиракай виридаз за сагърай лугьузва, — лагьана анал рахай В. Батманова.
Ада аялриз савкьат яз лезги чIалал акъатзавай «Кард» журналар багъишна. И. Заловади викIегьдиз мярекатда иштиракай аялриз, хъсандиз гуьруьш тешкилна кьиле тухвай Гъ. Ибрагьимовадиз рикIин сидкьидай сагърай лагьана.
Эхирдай аялри мугьманрихъ галаз рикIел аламукьдай шикилар яна. Са шакни алач, ихьтин метлеблу гуьруьшди аялриз дидедин чIал мадни кIанарда ва гьар са мярекатда абуру мадни еке гьевесдивди иштиракда.
Къагьриман Ибрагьимов
