Са хийирни хьанвач

Украинада къайда тунин патахъай гьеле меслятдал атанвач, вучиз лагьайтIа В. Зеленскийди мулкариз талукь месэлада вичин гафунал кIевивалзава. «РИА Новости» чешмеди раижзавайвал, ихьтин фикир Пентагондин генеральный инспекторди малумарна.

Вини дережада кьиле тухвай рахунри ислягьвилин икьрар кутIунунин нетижадал гъанач. Къейдзавайвал, мулкарин месэладин патахъай гьуьжетар ва хатасузвилин жигьетдай заминвилер себеб яз, рахунар хийир авачирбур яз амукьнава.

Пентагондин векилдин докладда къейднавайвал, Украинада призывникрин кьадар тIимил жезва, ВСУ-дин боевикар лагьайтIа, бегьемдиз гьазурзавач. ГьакIни Украинадин кьушунар дяведин суьрсет ва беспилотникар бес тежезвайвиляй кIеве гьатзава. Америкадин военный ведомстводи хиве кьазвайвал, Россиядихъ стратегиядин ва тадиз кьабулзавай серенжемрин жигьетдай артуханвал ава.

Генеральный инспекторди докладда мадни къейднава хьи, 2024-йисан апрелдилай США-ди Украинадиз пулунин жигьетдай куьмек гун патал алава серенжемар кьабулнавач, Америкадин гьукумдарри и месэла Европадин амадагрин хиве тунва.

Иран гьазур я

США-ди цIийи кьилелай гьужумар тикрарун мумкин яз гьисабуналди, Тегеранди тактикадин рекьяй цIийи жуьреда гьазурвилер акунва. Идакай «РИА Новости» чешмеди хабар гана.

Эгер США-дин президент Д.Трампа гьужумар давамарунин буйругъ гайитIа, Пентагонди ягъунар кьун патал Ирандин бязи объектрин сиягь  гьазурнавайдакай идалай вилик CNN телеканалди хабар ганай. Къейд ийин, алатай гьяддиз Трампа Ирандивай икьрар кутIунунин месэла гежел вегьин тавун истемишнай.

РикIел хкин, 28-февралдиз США-дини Израилди Ирандин объектриз ягъунар кьаз эгечIнай. 3 агъзурдалай виниз ксар къурбандриз элкъвена. Вашингтонни Тегеран 8-апрелдиз ягъу­нар акъвазарунин меслятдал атана. Идалай кьулухъ Исламабадда кьиле фейи рахунар нетижасузбур хьана, гьа са вахтунда женгерин гьерекатар давамар хъувуникай хабар ганач, амма Америкади Ирандин портар кьаз башламишна.

Мана авачир серенжемар

Мукьвара Евросоюзди Россиядиз акси яз малумарай санк­­цияр Москвади нубатдин серенжем яз гьисабзава. ГьикI хьайи­тIани, кардик кутунвай сергьятвилерихъ са манани авач. Ихьтин фикир, «РИА Новости» чешмеди кхьизвайвал, РФ-дин МИД-дин экономикадин рекьяй амадагвал авунин директор Д. Би­ри­чевскийди лагьанва.

Адан гафаралди, ихьтин аксивилер авунин макьсад Россияда уьмуьр четинарун я. Ихьтин гьерекатралди РагъакIидай патан уьлквейриз Москва экономикадин рекьяй эзмишиз кIанзава.

Ихтилат физвай цIийи санкцияр энергетикадин хилез талукьбур я ва абурукай Европадин союзди 23-апрелдиз хабар ганай. Идалай вилик США-дин финансрин министерстводи Россиядин нафтIадиз талукь санкцияр вацран муддатда къуватдай вегьенвайдакай малумарнай.

Кьилиз яд чимун я

Россиядин МИД-дин векил Мария Захаровади «РИА Новос­ти» чешмедиз малумарайвал, Литвадин МИД-дин кьил К. Буд­риса Калининграддал гьужум авуниз эвер гун акьулсузвилин, вичи вичин кьилиз яд чимунин лишан я.

Къейд ийин, идалай вилик К.Будриса НАТО-диз Калининграддал гьужум авуниз эвер ганай. Будрисан фикирдалди, гуя НАТО-диз шегьерда Россиядин базаяр тергдай такьатар авазва.

Дронар хутахун истемишзава

Грецияди Украинадивай Средиземный гьуьлуьн сергьят­рай пилот галачир катерар ахкъудун истемишдайвал я. Идакай «Kathimerini» изданиди хабар гузва.

Грециядин гьукумдарар ихьтин фикирдал Лефкада островдин рагъакIидай патан къерехда гьуьлуьн дрон пайда хьунин делилди гъана. Къейдзавайвал, жагъанвай аппарат целай фидай «Козак Мамай» тIвар алай БПЛА-камикадзе я. Идалай вилик Киевди Афинриз гьуьлуьн ихьтин дронар Россиядин «хъендик квай флотдин» хура акъвазун патал гьазурнавайбур я лагьанай.

«Лезги газет»