Россиядин халкьарин садвилин йисан сергьятра аваз, 17-21-майдиз республикада кьиле фейи эдебиятдин международный дережадин сад лагьай «Чешмеяр» фестиваль рикIел аламукьдай сувариз элкъвена. Виридаз чизвайвал, Дагъустандин шииратдин югъ Махачкъалада «XX асирдин Гомер», республикадин писателрин тешкилатдин эвелимжи регьберрикай сад хьайи СтIал Сулейманан гуьмбетдин патав ам хайи юкъуз къейд авунин дурумлу адет гьеле 74 йис вилик жегьил Расул Гьамзатова кутунай. Ада вичини датIана и мярекатда иштиракдай. Чи рикIел аламайвал, и суварин дережа хкажунин, адан сергьятар гегьеншарунин, ам регионрин арада фидай фестивалдиз элкъуьрунин меслят алатай йисуз республикадин виликан кьил Сергей Меликова ганай. Гила и проект Дагъустандин медениятдин министерстводини писателрин союзди кьилиз акъудна.
Махачкъалада 18-майдиз фестивалдин иштиракчияр СтIал Сулейманан тIварунихъ галай паркуна кIватI хьана. Шаирдин гуьмбетдал цуьквер эцигайдалай кьулухъ шад гьалара кьиле фейи мярекатдал республикадин медениятдин министр Зарема Бутаевади лагьайвал, «асиррин къене литература чIалар ва халкьар сад ийидай муькъуьз элкъвенай. Дагъустандин куьгьне девиррин гзаф шаирри — Етим Эминани Ирчи Къазакьа, Кахаб-Росодай тир Магьмудани Омарла Батырая, гуьгъуьнлай — Гьамзат ЦIадасадини АбутIалиб Гъафурова ва, гьелбетда, СтIал Сулеймана – гила вичел чи вири литература акъвазнавай бине кутуна. Абуру чаз чIехидаз гьуьрмет, зайифдан къайгъударвал ийидай, фазни циз къимет гудай ва маса чпел уьмуьр акъвазнавай адетар туна. Абурулай чаз вичин важиблувал вахтунивай зайифариз тежезвай весиятни амукьна: чи къуват садвиле ава».
– Алай девирда, – давамарна министрди, – геополитикадин муракаб гьалара, чаз акси къуватри тарих чпиз лазим тирвал туькIуьр хъийидай алахъунар ийизвайла, халкьарин арада гъулгъула твазвайла, бубайрилай чаз амукьнавай адетар къуватдай вегьез алахънавайла, чи литературадин классикрин ирсинин важиблувал мадни артух жезва.
Дагъустандин писателрин союздин председатель Марина Колюбакинади-Агьмедовади вичин рахунра Дагъустандин литературадин бине кутурбурун шииратди, Россиядин ва виридуьньядин инсанперес шииратди хьиз, инсанар чеб чпин гъавурда акьаз, халкьарин арада дуствал мягькемариз куьмекзавайди къейдна.
Сад лагьай «Чешмеяр» фестиваль 17-майдиз уьлкведин жуьреба-жуьре регионрай мугьманар къаршиламишуналди башламиш хьана. Фестивалди Москвадай, Беларусь Республикадай ва Гуржистандай, Кеферпатан Кавказдин республикайрай, Якутиядай, Россиядин шегьеррай атанвай писателризни шаирриз, критикризни таржумачийриз чпиз чеб аквадай, гуьруьшмиш жедай мумкинвал гана. И юкъуз мугьманри республикадин меркездин эдебиятдихъ галаз алакъалу чкайра (СтIал Сулейманан тIварунихъ галай паркуна) сейр авуна. «Дагъустан» ГТРК-да интервью, Шииратдин музейда «Халкьарин садвал – литературайрин садвал» лишандик кваз элкъвей стол тухвана.
Суварин иштиракчийри Э. Капиеван, Х. Тагьиран, Гь. ЦIадасадин, А. Гъафурован гуьмбетрални цуьквер эцигна. Шииратдин театрда Москвадай атанвай Литературадин институтдин профессор, тIвар-ван авай литературовед Игорь Волгинахъ галаз гуьруьш, Дагъустандин халкьдин шаир Анвар Аджиеван кIвале-музейда шииратдин «Заз вири халкьар бегенмиш я пара» межлис кьиле фена.
Каспийскда и юкъуз СтIал Сулейманан тIварунихъ галай 11-нумрадин гимназиядани «Чешмейрин» мярекат хьана. Ана, гьуьрметлу мугьманар яз, республикадин Халкьдин Собранидин образованидинни илимдин комитетдин председатель Елена Павлюченкоди, РФ-дин журналистрин союздин РД-да авай отделенидин председатель Мегьамед Ибрагьимова иштиракна. Актовый залда гимназиядин директор Мурад Идрисова ачухай собранидал М. Колюбакина-Агьмедова рахана, шаирри чпин шиирар кIелна.
19-майдиз фестивалдин иштиракчияр Дербент шегьердиз ва СтIал Сулейманан райондиз рекье гьатна. Агъа СтIалдал абур шаирдин кIвализ-музейдиз мугьман хьана, Кьасумхуьрел шииратдин межлис кьиле фена. 20-майдиз фестивалдин программадик кваз шад мярекатар Хасавюрт районда давамарна. Суварин иштиракчийри Эндирей хуьре – Дагъустандин халкьдин шаир Къазияу Алидин, Аксайда Дагъустандин халкьдин шаирдин тIвар вичиз С. Сулейманахъни Гь. ЦIадасадихъ галаз санал гайи Абдулла Мегьамедован гуьмбетрал цуьквер эцигна. И хуьрени шииратдин межлис хьана. Къе, 21-майдиз, гьуьрметлу мугьманар рекье хутазва.
Гьа икI, СтIал Сулейманан яратмишунрин ирсинин лишандик кваз тешкилзавай эдебиятдин фестивалдин дережа авайдалай виниз хкаж хьанва. И йисалай эгечIна, адахъ международный, регионрин арада тешкилзавай фестивалдин дережа ава. Дагъларин уьлкведин медениятдин уьмуьрда лишанлу вакъиадиз элкъвенвай и мярекат гьар йисуз тухуда. «Чешмеяр» фестивалдин макьсад яратмишзавай ксарин алакъаяр мягькемарун, эдебиятдин адетар хуьн, Дагъустандин меденият халкьарин арада машгьурун я.
Чи мухбир
