И йикъара Махачкъалада, Р. Гьамзатован куьчеда авай «Поэзиядин театрдин» дараматда,  9-Майдин сувариз талукьарна,  «Ватан хвейибурун югъ»  мярекат-конкурс кьиле тухвана. Ана республикадин саки вири районрин мектебрай атай гзаф кьадар аялри иштиракна.

СтIал Сулейманан райондай мярекатдиз Вини СтIал­рин школадин 7-класс­дин уче­ница Балакъардашева Минаят рекье тунвай.

Конкурсдин нетижаяр кьурдалай кьулухъ малум хьайивал,­ Минаят финалдиз акъатна. Ада кIелай, урус чIалал вичи туь­кIуьрнавай, аскердиз бахшнавай шиир жюридиз гзаф бегенмиш­ хьана. Классдин руководителдин гафарай, Минаята, сад лагьай классдилай башламишна вири тарсарай «вадар» аваз кIелзава ва мектебда кьиле тухузвай  мярекатра активнидаказ иштиракзава. Ада Вини СтIалрин мектебда зегьметдин тарсар гузвай вичин буба Эмир муаллимдилай чешне къа­чузва.

Конкурсда 2-чка кьур  Минаятаз грамота ва 7000 манатдин  сертификат гана. Халкьдин мисалда лагьанвайвал, чIехи агалкьунар гъвечIи камарилай  башламиш жеда. Минаятахъ мадни зурба агалкьунар хьун чи мурад я.

Замир  Мегьамедов