Дагъустандин кьилин МФЦ-дин пешекарри хабар гайивал, алай йисан майдилай са жерге къанунар къуватда гьатнава.
Гзаф аялар авай хизанриз куьмек. Ихьтин хизанривай гила, гьатта къазанжидин кьадар 10 процент артух хьанваз хьайитIани, гьар вацра аялриз гузвай такьатар къачун давамариз жеда. Маса гафаралди лагьайтIа, хизанда авай гьар са касдал республикада малумарнавай яшамиш хьунин агъа кIанин кьадардилай 10 процентдив агакьна артух къазанжи гьалтайтIани, пулунин такьатар гун давамарда. Идан гьакъиндай агьалийри алава яз арза вугунин чарасузвал авач.
СВО-дин иштиракчийрин хендедайриз талукь яз. СВО-да телеф хьайи аскеррин уьмуьрдин юлдашривай (цIийи кьилелай эвленмиш тахьанвайбуруз талукь я), кьилдин квотадин сергьятра аваз, гьавая бакалавриатдин ва специалитетдин программадай кIелуник экечIиз жеда.
Сагъардай чкадиз кьван гьавая фин. Эгер Росгвардиядин къуллугъчи заландиз азарлу хьайитIа, адан лап мукьва 2 касдивай ва я хизанэгьлийривай азарлуди сагъарзавай чкадиз гьавая физ жеда.
СБП-дин (система быстрых платежей) къиметар. 1-майдилай СБП-дай пулунин такьатар ракъурунин къиметар (тариф) дегиш хьанвач. Виликдай хьиз, исятдани ватандашривай вацран муддатда 100 агъзур манатдив агакьна гьавая пул ракъуриз жезва.
«Лезги газет»
