РД-дин Кьилин везифаяр вахтуналди тамамарзавай Фёдор Щукина «Время героев» программадин иштиракчияр тир Россиядин Игитар Темирлан Абуталимовахъни Энвер Набиевахъ ва «Жуьрэтлувиляй» пуд ордендин сагьиб Мегьамед Валиховахъ галаз гуьруьш кьиле тухвана.

Гуьруьшдал къейд авурвал, Украинада кьиле физвай махсус серенжемдин ветеранрин алакьунрикай, пешекарвиликай гьам региондин, гьамни муниципалитетдин дережада менфят къачун герек я. Ф. Щукина гекъигун патал са мисал гъана: Ватандин ЧIехи дяведилай гуьгъуьнин йисара жавабдар хейлин къуллугъар фронтовикри кьиле тухванай. Адан фикирдалди, ислягь уьмуьрдив эгечI хъувунвай аскерар районра, поселокра, хуьрера чкадин самоуправленидин органра кIвалахунал желбна кIанда.

ГьакIни гуьруьшдал государстводин къуллугъдихъ галаз алакъалу къанундик, алай аямдин бязи делилар фикирда кьуна, дегишвилер кухтунин игьтияж авайдини къейдна. И карди СВО-дин ветеранар идара ийидай къуллугърал желб авунин месэла регьятарда.

«Лезги газет»